សហព័ន្ធខ្មែរកម្ពុជាក្រោមនឹងចូលថ្លែង ការណ៍ នៅក្នុងអង្គការសហប្រជាជាតិ នៅចុងខែមេសា
ដោយ ថាច់ ប្រីជា គឿន l សារព័ត៌មាន ព្រៃនគរ
សហព័ន្ធខ្មែរកម្ពុជាក្រោមនឹងចូលថ្លែងការណ៍នៅក្នុងវេទិកាអចិន្ត្រៃយ៍ នៃអង្គការសហប្រជាជាតិ ស្ដីពីបញ្ហាជនជាតិ ដើម ដែលហៅកាត់ជាភាសាអង់គ្លេសថា UNPFII នៅចុងខែមេសា ខាងមុខនេះ ។ អង្គការសហ ប្រជាជាតិនឹង បើកកិច្ចប្រជុំ លើកទី ១៤ នៃវេទិកាអចិន្ត្រៃយ៍ស្ដីបញ្ហាជនជាតិដើម ដែលនឹងប្រព្រឹត្តទៅនៅការិយាល័យកណ្ដាល នៃអង្គការសហប្រជាជាតិ នាទីក្រុងញីវយ៉ក សហរដ្ឋអាមេរិក ចាប់ពីថ្ងៃទី ២០ ខែមេសា ដល់ថ្ងៃទី ១ ខែឧសភា ឆ្នាំ ២០១៥ ខាងមុខនេះ ។
យោងតាមសេចក្ដីជូនដំណឹងមួយរបស់សហព័ន្ធខ្មែរកម្ពុជាក្រោម បានបញ្ជាក់ថា អង្គការសហប្រជាជាតិបាន ទទួលនូវរបាយការណ៍ស្ដីពីបញ្ហាសិទ្ធិមនុស្សនៅកម្ពុជាក្រោម ពីសហព័ន្ធខ្មែរកម្ពុជាក្រោម និងបានអនុម័តថានឹងឲ្យ សហព័ន្ធខ្មែរកម្ពុជាក្រោម ចូលថ្លែងការណ៍នៅក្នុងអង្គការសហប្រជាជាតិ នៅក្នុងខែមេសា ខាងមុខនេះ រួចហើយ ។
ចាប់ពីឆ្នាំ ២០០៤ មក នៅក្នុងខែឧសភា រៀងរាល់ឆ្នាំ សហព័ន្ធខ្មែរកម្ពុជាក្រោម តែងតែងចូលថ្លែងការណ៍ស្ដីអំពី បញ្ហាសិទ្ធិមនុស្សខ្មែរក្រោម នៅក្នុងវេទិកាអចិន្ត្រៃយ៍នៃអង្គការសហប្រជាជាតិ ស្ដីពីបញ្ហាជនជាតិដើម ដើម្បីជម្រាប ដល់សហគមន៍អន្តរជាតិបានដឹងពីទុក្ខកង្វល់ផ្សេងៗរបស់ពលរដ្ឋខ្មែរក្រោម ដែលត្រូវបានរំលោភបំពានពីរដ្ឋាភិបាល វៀតណាម សព្វថ្ងៃ ។
របៀបវារៈនៃកិច្ចប្រជុំឆ្នាំនេះ រួមមាន ១០ ចំណុច ក្នុងនោះ មានការបោះឆ្នោតជ្រើសតាំងមន្ត្រី UNPFII, ការអនុវត្ត សេចក្តីប្រកាសរបស់អង្គការសហប្រជាជាតិស្តីពីសិទ្ធិជនជាតិដើមភាគតិច និង ការពិភាក្សាជាមួយអ្នករាយការណ៍ ពិសេសស្តីពីសិទ្ធិរបស់ជនជាតិដើម និងជាមួយប្រធាននៃយន្តការអ្នកជំនាញស្តីពីសិទ្ធិជនជាតិដើម ជាដើម ៕
Comments are closed.