សហព័ន្ធខ្មែរកម្ពុជាក្រោមថ្វាយសាររំលែកទុក្ខចំពោះ ការសោយព្រះទិវង្គតនៃព្រះមហាក្សត្រិយ៍ថៃ
សហព័ន្ធខ្មែរកម្ពុជាក្រោម បានថ្វាយសារចូលរួមរំលែកទុក្ខដល់រាជវង្ស រដ្ឋាភិបាល និងប្រជាជនថៃ ចំពោះ ការសោយព្រះទិវង្គតនៃព្រះមហាក្សត្រិយ៍ថៃ ព្រះបាទសម្ដេចព្រះបរមិន្ទ្រ មហាភូមិពល អតុល្យតេជ ដែលទ្រង់ បានសោយព្រះទិវង្គត កាលពីថ្ងៃទី ១៣ ខែតុលា ឆ្នាំ ២០១៦ កន្លងទៅនេះ ។
យោងតាមសារមួយច្បាប់ចុះថ្ងៃទី ១៣ ខែតុលា ឆ្នាំ ២០១៦ ចុះហត្ថលេខាដោយលោក ថាច់ វៀន អធិបតី សហព័ន្ធខ្មែរកម្ពុជាក្រោម ជូនចំពោះឯកអគ្គរដ្ឋទូតថៃ ប្រចាំរដ្ឋធានី Washington សហរដ្ឋអាមេរិក លោក Pisan Manawapat ថា ក្នុងនាមតំណាងសមាជិក និង សមាជិក នៃសហព័ន្ធខ្មែរកម្ពុជាក្រោមទូទាំង ពិភពលោក សូមចូលរួមកាបន់ទុក្ខជាមួយនឹងក្រុមរាជវង្ស រដ្ឋាភិបាល និងប្រជាជនថៃ ទូទាំងប្រទេស ក្នុង ឱកាសដ៏ក្រៀមក្រំដែលព្រះមហាក្សត្រិយ៍ថៃ ព្រះបាទសម្ដេចព្រះបរមិន្ទ្រ មហាភូមិពល អតុល្យតេជ បាន សោយព្រះទិវង្គត ។
ឆ្លៀតក្នុងឱកាសនេះ ខ្ញុំសូមថ្លែងអំណរគុណយ៉ាងជ្រាលជ្រៅចំពោះព្រះរាជហឫទ័យ មេត្តា ករុណា របស់ទ្រង់ ដែលបានព្រះរាជទានទីកន្លែងសម្រាប់ជនភៀសខ្លួនខ្មែរក្រោម ដែលបានភៀសខ្លួនពីការគាបសង្កត់សិទ្ធិ មនុស្សដោយរដ្ឋាភិបាលវៀតណាម មកសុំសិទ្ធិជ្រកកោន នៅក្នុងអង្គការ UNHCR នៅក្នុងប្រទេសថៃ និង បានព្រះរាជអនុញ្ញាតឱ្យព្រះសង្ឃខ្មែរក្រោមមកពីដែនដីកម្ពុជាក្រោម និងប្រទេសកម្ពុជា ទៅបន្តការសិក្សានៅ ប្រទេសថៃ ។
សូមបញ្ជាក់ថា ព្រះមហាក្សត្រិយ៍ ដែលគ្រងរាជ្យយូរជាងក្សត្រិយ៍អង្គណាៗក្នុងលោក ព្រះបាទសម្ដេចព្រះ បរមិន្ទ្រ មហាភូមិពល អតុល្យតេជ បានសោយព្រះទិវង្គត នារសៀលថ្ងៃព្រហស្បតិ៍ ទី ១៣ ខែតុលា ឆ្នាំ ២០១៦ នេះ ។
យោងតាមសេចក្ដីប្រកាស ពីសំណាក់ព្រះរាជវាំងថៃបានឲ្យដឹងថា ព្រះអង្គស្ដេចយាងទៅប្រថាប់ ព្យាបាល ព្រះរោគ នា មន្ទីរពេទ្យសិរិរាជ តាំងតែថ្ងៃសុក្រ ទី ៣ ខែតុលា ឆ្នាំ ២០១៤ មក ដោយមានគណៈពេទ្យថៃ ថ្វាយការរក្សាព្រះរោគជាលំដាប់រហូតដល់ថ្ងៃសោយព្រះទិវង្គត ក្នុងព្រះជន្ម ៨៩ ព្រះវស្សា គ្រងរាជសម្បត្តិបាន ៧០ ឆ្នាំ ៕
Comments are closed.