ដោយ ថាច់ ប្រីជា គឿន l សារព័ត៌មាន ព្រៃនគរ
សហព័ន្ធខ្មែរកម្ពុជាក្រោម ទើបតែបានចូលទៅជួបមន្ត្រីក្រសួងការបរទេសសហរដ្ឋអាមេរិក នៅរដ្ឋធានី Washington ដើម្បីជម្រាបអំពីបញ្ហាសិទ្ធិមនុស្សនៅកម្ពុជាក្រោម និងជម្រុញឲ្យសហរដ្ឋអាមេរិកដាក់ សម្ពាធទៅរដ្ឋាភិបាលបក្សកុម្មុយនិស្ដវៀតណាមឲ្យមានការគោរពសិទ្ធិខ្មែរក្រោមម្ចាស់ស្រុក នៃដែនដី កម្ពុជាក្រោម ។
យោងតាមសេចក្ដីជូនដំណឹងមួយពីអ្នកស្រី កៀង សុធី ប្រធានគណៈកម្មការយុវជនសហព័ន្ធខ្មែរកម្ពុជា ក្រោមតាមរយៈសារអ៊ីមែល ដែលការិយាល័យវិទ្យុសំឡេងកម្ពុជាក្រោមទទួលបានថា នៅថ្ងៃទី ២៥ ខែ កក្កដា កន្លងទៅនេះ មន្ត្រីសហព័ន្ធខ្មែរកម្ពុជាក្រោមបានចូលទៅជួបមន្ត្រីក្រសួងការបរទេសសហរដ្ឋ អាមេរិក នៅរដ្ឋធានី Washington ដើម្បីជម្រាបអំពីបញ្ហាសិទ្ធិមនុស្សនៅកម្ពុជាក្រោម ។
មន្ត្រីសហព័ន្ធខ្មែរកម្ពុជាក្រោម ដែលបានចូលជួបមន្ត្រីក្រសួងការបរទេសអាមេរិកនោះ រួមមាន លោក ត្រឹង យ៉ាប ប្រធានរដ្ឋបាល, លោក ថាច់ សេ ប្រធានសភាតំណាង, លោក ទ្រីវ ជីម, លោក ត្រឹង ម៉ាន់ រិន្ទ ប្រធានផែនការ, លោក ឡឹម ដន ក្រុមយុវជនសហព័ន្ធខ្មែរកម្ពុជាក្រោម និង អ្នកស្រី កៀង សុធី ប្រធាន គណៈកម្មាធិការយុវជនសហព័ន្ធខ្មែរកម្ពុជាក្រោម ។
មន្ត្រីសហព័ន្ធខ្មែរកម្ពុជាក្រោម បានលើកយកបញ្ហារបស់ ព្រះតេជព្រះគុណ ថាច់ ធឿន និង ព្រះតេជព្រះ គុណ លីវ នី ព្រះសង្ឃវត្តសិរីតាសេក និងអ្នកភូមិតាសេក ២ រូបផ្សេងទៀត ដែលត្រូវបានរដ្ឋាភិបាលវៀត ណាមចាប់ដាក់គុក កាលពីខែឧសភា ឆ្នាំ ២០១៣ កន្លងទៅនេះ ជម្រាបទៅមន្ត្រីក្រសួងការបរទេស អាមេរិក ។
សូមបញ្ជាក់ សិរីតាសេក ជាវត្តមួយឋិតនៅក្នុងស្រុកជ្រោយញរ ខេត្តឃ្លាំង ត្រូវបានរដ្ឋាភិបាលវៀតណាមឡោមព័ទ្ធ ដើម្បីចាប់ព្រះសង្ឃពីរអង្គ កាលពីឆ្នាំ ២០១៣ កន្លងទៅនេះ ដោយចោទពីបទថា ព្រះសង្ឃទាំងនេះបានទាក់ទងខ្មែរក្រោមនៅក្រៅប្រទេស និងបានបំពេញធម្មនុញ្ញសមាគមព្រះពុទ្ធសាសនាវៀត ណាម ។ ក្នុងព្រឹត្តិការណ៍នេះ ពុទ្ធបរិស័ទរាប់រយនាក់ បានចូលមកវត្តសិរីតាសេកប្រឆាំងនឹងក្រុមអាជ្ញាធរវៀតណាមដែលចូលមកវត្តបម្រុងនឹង ចាប់ព្រះសង្ឃ ។
នៅ ថ្ងៃ ២១ ខែឧសភា ឆ្នាំ ២០១៣ ព្រះសង្ឃ ២ អង្គ គឺ ព្រះតេជព្រះគុណ លីវ នី ប្រសូត ឆ្នាំ ១៩៨៦ ជាព្រះចៅអធិការវត្តសេរីតាសេក ព្រះតេជព្រះគុណ ថាច់ ធឿន ប្រសូត ឆ្នាំ ១៩៨៥ ជាគ្រូសូត្រវត្តសេរីតាសេក និងប្រជាពលរដ្ឋខ្មែរក្រោម ២ រូបគឺ លោក ថាច់ ភូមិរិទ្ធ និង លោក ត្រា វណ្ណថា ត្រូវបានអាជ្ញាធរវៀតណាមចាប់ខ្លួន ត្រូវអាជ្ញាធរវៀតណាមចាប់ខ្លួននៅច្រកព្រំដែនកម្ពុជាវៀតណាម ខណៈដែលអ្នកទាំង នេះព្យាយាមភៀសខ្លួនចេញទៅ ប្រទេសកម្ពុជា ។
ក្រោយពីបានចាប់ខ្លួនព្រះសង្ឃ និងអ្នកភូមិដាក់ពន្ធនាគារប៉ុន្មានខែមក ថ្ងៃ ២៧ ខែកញ្ញា ២០១៣ តុលា ការខេត្តឃ្លាំងសម្រេចផ្ដន្ទាទោសព្រះសង្ឃ ២ អង្គ និងពលរដ្ឋខ្មែរក្រោម ២ រូបដែលត្រូវចាប់ខ្លួននោះ ឲ្យជាប់គុកពី ២ ឆ្នាំ ទៅ ៦ ឆ្នាំ ពីបទ “ភៀសខ្លួនទៅប្រទេសក្រៅដើម្បីប្រឆាំងរដ្ឋាភិបាល” និង បទ “ចាត់ តាំងនាំមនុស្សរត់ចេញទៅបរទេស” ៕
Comments are closed.