ខ្មែរក្រោមនឹងធ្វើមហាបាតុកម្មនៅអ៊ឺរ៉ុបជម្រុញឲ្យអន្តរជាតិដាក់សម្ពាធវៀតណាម
ដោយ ថាច់ ប្រីជា គឿន l សារព័ត៌មាន ព្រៃនគរ
នៅថ្ងៃទី ០៣ ខែធ្នូ ខាងមុខនេះ សហព័ន្ធខ្មែរកម្ពុជាក្រោម នៅអ៊ឺរ៉ុប នឹងធ្វើមហាបាតុកម្មនៅមុខការិយា ល័យសភាអ៊ឺរ៉ុប នាទីក្រុងព្រូសែល ប្រទេសបែលហ្ស៊ីក ដើម្បីជម្រុញឲ្យសហគមន៍អន្តរជាតិដាក់សម្ពាធ ដល់រដ្ឋាភិបាលវៀតណាម និងទាមឲ្យវៀតណាមដោះលែងព្រះសង្ឃ និងពលរដ្ឋខ្មែរក្រោម នៅខេត្តឃ្លាំង ដែលអាជ្ញាធរវៀតណាមទើបតែប្រកាសសាលក្រមផ្ដន្ទារទោសឲ្យជាប់ពន្ធនាគារពី ១០ ខែទៅ ៦ ឆ្នាំ កាលពីខែកញ្ញា កន្លងទៅនេះ ។
ខ្មែរក្រោមនឹងធ្វើមហាបាតុកម្មនៅអ៊ឺរ៉ុបជម្រុញឲ្យអន្តរជាតិដាក់សម្ពាធវៀតណាម
យោងតាមសេចក្ដីប្រកាសជូនដំណឹងមួយតាមរយៈសារអ៊ីម៉ែល ពី លោក ថាច់ វៀន អធិបតីសហព័ន្ធខ្មែរ កម្ពុជាក្រោម ដែលមានមូលដ្ឋាននៅប្រទេសបារាំង បានបញ្ជាក់ថា សហព័ន្ធខ្មែរកម្ពុជាក្រោម នឹងធ្វើមហា បាតុកម្ម នាទីក្រុងព្រូសែល ប្រទេសបែលស្សែក នៅថ្ងៃទី ០៣ ខែធ្នូ ខាងមុខនេះ ។
យោងតាមសេចក្ដីប្រកាសនេះដដែល សហព័ពន្ធខ្មែរកម្ពុជាក្រោម បានបញ្ជាក់អំពីមូលហេតុ នៃការធ្វើ មហាបាតុកម្មមួយនេះថា “ដើម្បីសម្ដែងការប្រឆាំងទៅនឹងអំពើអយុត្តិធម៌ដ៏ឃោរឃៅ” និង “ដើម្បីសម្ដែងនូវ ការឈឺចាប់” របស់ខ្លួន ហើយសុំអំពាវនាវឲ្យសហគមន៍អន្តរជាតិ ជាពិសេសសភាអ៊ឺរុបដាក់សម្ពាធ ដល់រដ្ឋាភិបាលបក្សកុម្មុយនិស្តវៀតណាមឲ្យដោះលែងព្រះសង្ឃ និងពលរដ្ឋខ្មែរក្រោម នៅខេត្តឃ្លាំង ដោយឥតលក្ខខណ្ឌ និងបង្ខំឲ្យវៀតណាមត្រូវតែគោរពសិទ្ធិមនុស្សក្នុងនាមជាសមាជិកនៃអង្គការសហ ប្រជាជាតិ ។
សេចក្ដីជូនដំណឹងនេះ សហព័ន្ធខ្មែរកម្ពុជាក្រោម ក៏បានអំពាវនាវឲ្យពលរដ្ឋខ្មែរគ្រប់ស្រទាប់ដែលជាអ្នក ស្រឡាញ់នូវយុត្តិធម៌ សិទ្ធិមនុស្ស និងសេរីភាព នៅគ្រប់និន្នការនយោបាយឲ្យចូលរួមធ្វើមហាតុកម្មឲ្យ បានកុះករ ដើម្បីសម្តែងនូវការឈឺចាប់ជាមួយនឹងជនរងគ្រោះ និងក្រុមគ្រួសារ ។
នៅក្នុងខែតុលា ឆ្នាំ ២០១៣ នេះ សហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក បានចេញសេចក្ដីថ្លែងការណ៍ជាភាសាអង់គ្លេសមួយ ហើយបានចេញផ្សាយតាមគេហទំព័រជាផ្លូវការរបស់ខ្លួន បញ្ជាក់ថា កាលពីថ្ងៃទី ២៥ និងថ្ងៃទី ២៧ ខែកញ្ញា តុលាការប្រជាជនវៀតណាម ខេត្តឃ្លាំង បានបើកសវនាកាត់ទោសព្រះសង្ឃចំនួន ២ អង្គ និងពលរដ្ឋខ្មែរក្រោមចំនួន ៧ នាក់ ឲ្យជាប់ពន្ធនាគារពី ១០ ខែទៅ ៦ ឆ្នាំ ដោយចោទប្រកាន់ពីបទបង្កឲ្យមានការខូចខាតសណ្ដាប់ធ្នាប់សាធារណៈ ការផ្ដល់សម្ភាសន៍ដល់ វិទ្យុសំឡេងកម្ពុជាក្រោម និង វិទ្យុអាស៊ីសេរី ទាក់ទងនឹងសហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក និងពីបទប៉ងរត់ចេញទៅក្រៅប្រទេសដើម្បីប្រឆាំងរដ្ឋាភិបាលវៀតណាម ។
សេចក្ដីថ្លែងការណ៍នេះ បានបន្តទៀតថា កាលពីថ្ងៃទី ២៥ ខែកញ្ញា អ្នកភូមិព្រៃជាប់ ៥ នាក់ ដែលជាប់ទាក់ទិននឹង ព្រះតេជព្រះគុណ លី ចិន្ដា នៃវត្តព្រៃជាប់ ត្រូវបានតុលាការបក្សកុម្មុយនិស្តវៀតណាម ប្រកាសសាលក្រមឲ្យជាប់ពន្ធនាគារម្នាក់ៗ ពី ១០ ខែទៅ ១ ឆ្នាំ ពីបទ “បង្កអសន្តិសុខទីសាធារណៈ” តាមមាត្រា ២៤៥ នៃច្បាប់ព្រហ្មទណ្ឌ របស់ប្រទេសវៀតណាម ។
ជនជាប់ចោទជាពលរដ្ឋខ្មែរក្រោមទាំង ៥ នាក់ នេះ មានស្រុកកំណើតនៅភូមិបៀងដុង A (Bien Dong A ) ឃុំ វិញត្រាច់ដុង (Vinh Trach Dong) ទីក្រុងពលលាវ ខេត្តពលលាវ ម្នាក់ៗត្រូវបានតុការដំបូង របស់ បក្សកុម្មុយនិស្ត វៀតណាមសម្រេចប្រកាស សាលក្រមឲ្យជាប់គុក ដូចតទៅ ៖
១.អ្នកស្រី លី ធី សាបុត (Lý Thị Sà Bột) ១ ឆ្នាំ
២.អ្នកស្រី លី ធី យន់ (Lý Thị Dạnh) ១ ឆ្នាំ
៣.អ្នកស្រី ឡឹម ធី ឡង (Lâm Thị Loan) ១ ឆ្នាំ
៤.លោក លី មិន ហាយ (Lý Minh Hải) ១១ ខែ និង
៥.លោក តាំង ផល្លា (Tăng Pho La) ១០ ខែ
ចំណែកអ្នកស្រី លី ធី សាបុត ត្រូវបានតុលាការកាត់ទោសកំបាំងមុខ ព្រោះគាត់បានភៀសខ្លួនចេញទៅក្រៅប្រទេសមុនពេលវៀតណាមចាប់ខ្លួន ។
យោងតាមសេចក្ដីប្រកាសរបស់ចៅក្រមនៅក្នុងអង្គសវនាការនេះថា ពលរដ្ឋខ្មែរក្រោមទាំង ៥ រូបនេះ ត្រូវ បានចោទប្រកាន់ទោស ព្រោះបានជួយទូងស្គរ និងវៃរគាំងនៅវត្តព្រៃជាប់ កាលពីថ្ងៃទី ២៣ ខែមីនា ឆ្នាំ ២០១៣ ដើម្បីប្រឆាំងនឹងការសម្រេចរបស់រដ្ឋាភិបាលវៀតណាម ក្នុងការចាប់ផ្សឹកព្រះតេជព្រះគុណ លី ចិន្ដា ។
មកដល់ថ្ងៃ ទី ២៧ ខែកញ្ញា តុលាការខេត្តឃ្លាំង នៃបក្សកុម្មុយនិស្តវៀតណាមបានប្រកាសសាលក្រម សម្រេចផ្ដន្ទាទោស ព្រះសង្ឃ ២ អង្គ និងពលរដ្ឋខ្មែរក្រោម ២ រូបឲ្យជាប់គុកម្នាក់ៗពី ២ ទៅ ៦ ឆ្នាំ ពីបទ “ចាត់តាំងនាំមនុស្សចេញទៅក្រៅប្រទេស” និង ” ទទួលប្រាក់ពីសហព័ន្ធខ្មែរកម្ពុជាក្រោម ដើម្បីចាត់តាំង ប្រឆាំងរដ្ឋាភិបាលបក្សកុម្មុយនិស្តវៀតណាម” ។
សាលក្រមនេះ បានសម្រេចផ្ដន្ទាទោស ព្រះតេជព្រះគុណ ថាច់ ធឿន (Thach Thuol) ប្រសូត ឆ្នាំ ១៩៨៥ ជាគ្រូសូត្រវត្តសេរីតាសេកឲ្យជាប់ពន្ធនាគារ ៦ ឆ្នាំ ព្រះតេជព្រះគុណ លីវ នី (Lieu Ny) ប្រសូត ឆ្នាំ ១៩៨៦ ជាព្រះចៅអធិការវត្តសេរីតាសេក ឲ្យជាប់ពន្ធនាគារ ៤ ឆ្នាំ លោក ថាច់ ភូមិរិទ្ធ (Thach Phum Rich) កើត ឆ្នាំ ១៩៨៩ ឲ្យជាប់ពន្ធនាគារ ៣ ឆ្នាំ ពីបទ “ភៀសខ្លួនទៅប្រទេសក្រៅ ដើម្បីប្រឆាំងរដ្ឋាភិ បាល” និង លោក ត្រា វណ្ណ ថា (Tra Quanh Tha) ឲ្យជាប់ពន្ធនាគារ ២ ឆ្នាំ ពីបទ “ចាត់តាំងនាំ មនុស្សរត់ចេញទៅប្រទេសក្រៅ” ។ អ្នកទាំង ៤ រូបនេះ មានស្រុកំណើត ឃុំវិញហាយ (Vĩnh Hải) ស្រុកជ្រោយញរ ខេត្តឃ្លាំង ។
នៅក្នុងសេចក្ដីថ្លែងការណ៍នេះ សហព័ន្ធខ្មែរកម្ពុជាក្រោម បានផ្ដល់អនុសាសន៍ទៅរដ្ឋាភិបាលវៀតណាម ចំនួន ៨ ចំណុច ក្នុងនោះមានការទាមទារឲ្យវៀតណាមដោះលែងព្រះសង្ឃ ២ អង្គ និងពលរដ្ឋខ្មែរក្រោម ទាំង ៦ នាក់ ដោយឥតលក្ខខណ្ឌ និងថ្លែងថា ការដែលវៀតណាមចាប់ព្រះសង្ឃ និងពលរដ្ឋខ្មែរក្រោម ដាក់ពន្ធនាគារនោះ ជាការបំពានលើមាត្រានៃសេចក្ដីប្រកាសជាសកលស្ដីពីសិទ្ធិមនុស្ស និងសិទ្ធិជន ជាតិដើម ដែលវៀតណាមជាប្រទេសហត្ថលេខី ៕
