លិខិតរបស់ប្រធានសភាព្រឹទ្ធាចារ្យនៃសហព័ន្ធ ខ្មែរកម្ពុជាក្រោមជូនចំពោះយុវជន ខ្មែរក្រោម នៅកម្ពុជាក្រោម
នៅក្នុងឱកាសបុណ្យចូលឆ្នាំខ្មែរ លោក ចៅ រៀប ប្រធានសភាព្រឹទ្ធាចារ្យ នៃសហព័ន្ធខ្មែរកម្ពុជាក្រោម បានផ្ញើសារចំហ មួយច្បាប់ ជា ៣ ភាសា (ខ្មែរ – អង់គ្លេស និង យួន) ជូនដល់ក្រុមយុវជនខ្មែរក្រោម នៅដែនដីកម្ពុជាក្រោម ដើម្បីដាស់ ស្មារតីពួកគេ មិនឲ្យបោះបង់អត្ដសញ្ញាណជាតិខ្លួន និងអំពីបញ្ហាដែលរដ្ឋាភិបាលវៀតណាមរើសអើង ពូជសាសន៍ លើពលរដ្ឋខ្មែរក្រោម ។
សារលិខិតនេះ មានសេចក្ដីដូចខាងក្រោម៖
Washington ថ្ងៃទី ០៧ ខែមេសា ឆ្នាំ ២០១៤៖ សារលិខិតជូនចំពោះយុវជនខ្មែរក្រោមនៅកម្ពុជាក្រោម ។ នៅតែប៉ុន្មាន ថ្ងៃទៀតទេ ពលរដ្ឋខ្មែរក្រោម នៅក្នុង និងក្រៅស្រុកនឹងអបអរសាទរពិធីបុណ្យចូលឆ្នាំរបស់ខ្លួន ។ ខ្ញុំបាទ ចៅ រៀប សូមតំណាងឲ្យសហព័ន្ធខ្មែរកម្ពុជាក្រោម សូមជូនពរដល់បងប្អូនកូនក្មួយក្រុមយុវជនខ្មែរក្រោម នៅដែនដីកម្ពុជា ក្រោម រីករាយ ជាមួយ បុណ្យចូលឆ្នាំថ្មី និងសូមឲ្យសម្រេចនូវអ្វីដែលកូនចៅប៉ុនប៉ងប្រាថ្នា ។
នៅក្នុងពិធីមួយនៅក្នុងថ្ងៃបុណ្យចូលឆ្នាំខ្មែរ គឺនឹកគុណដល់បុព្វបុរសរបស់យើងគ្រប់ជំនាន់ ដែលបានបូជាជីវិត សាច់ ស្រស់ ឈាមស្រស់ដើម្បីរក្សានូវឃ្លាំងវប្បធម៌ខ្មែរដ៏មានតម្លៃសម្រាប់ពួកយើងរាល់គ្នានៅថ្ងៃនេះ ។ សូមក្មួយៗ សួរខ្លួន ឯងមើលថា តើយើងអាចនៅឈរឱបដៃស្ងៀមចំពោះការបាត់បង់អត្តសញ្ញាណជាតិដូចជាជនជាតិចាមនៅ ភាគ កណ្ដាលប្រទេសវៀតណាមដែរឬទេ ដែលកាលនោះធ្លាប់ជាអតីតអាណាចក្រចម្ប៉ា តែបច្ចុប្បន្ន ពលរដ្ឋ ជាតិនេះនៅ មិនបានប្រហែលមួយសែននាក់ផង ។
ខ្ញុំមានការឈឺចាប់ខ្លាំងណាស់ពេលបានទទួលដំណឹងមកថា មានពលរដ្ឋខ្មែរក្រោមជាច្រើនកំពុងធ្វើការនៅទីក្រុង ព្រៃនគរ ក៏ដូចជានៅតាមសកលវិទ្យាល័យនានា មិនបានត្រឡប់ទៅស្រុកដើម្បីចូលរួមបុណ្យចូលឆ្នាំខ្មែររបស់ខ្លួន ។ សង្ឃឹមថា ក្មួយនឹងបានទទួលឆ្នាំថ្មីនៅក្នុងវត្តខ្មែរដែលនៅជិតកន្លែងដែលក្មួយៗរស់នៅ ។
ក្មួយៗមានការឈឺចាប់ទេ ខណៈដែលក្មួយៗកំពុងរស់នៅលើដែនដីកំណើតរបស់ខ្លួន តែមិនមានសិទ្ធិគ្រប់គ្រាន់ ដើម្បី ចូលរួមពិធីបុណ្យចូលឆ្នាំខ្មែររបស់ខ្លួន ។ មាននិស្សិតមួយចំនួនបានសុំច្បាប់ដើម្បីចាត់តាំងពិធីបុណ្យចូល ឆ្នាំ នៅតាម សកលវិទ្យាល័យ តែគេមិនអនុញ្ញាត ។ ការប្រារព្ធពិធីបុណ្យប្រពៃណីជាតិរបស់ខ្លួនជាសិទ្ធិមួយដែលមនុស្ស គ្រប់គ្នា ត្រូវតែបានទទួល ។ មិននឹកស្មានថា ក្មួយៗមិនមានសិទ្ធិដើម្បីទទួលបាននូវសិទ្ធិជាមូលដ្ឋានទាំងនេះ ។ ព្រោះតែសិទ្ធិ មនុស្សជាមូលដ្ឋានទាំងនោះរបស់ក្មួយត្រូវបានបាត់ ទើបខ្មែរក្រោម នៅក្រៅប្រទេស ក្រោមការដឹកនាំ របស់សហព័ន្ ធខ្មែរកម្ពុជាក្រោម បានទាមទារមិនឈប់មិនឈរ ដើម្បីសិទ្ធិជាមូលដ្ឋានដល់ក្មួយៗ ។
ប៉ុន្មានឆ្នាំមកនេះ ពលរដ្ឋខ្មែរក្រោមចេះប្រើប្រាស់អិនធើណិត និងបណ្ដាញសង្គម ក្មួយៗបានបានជ្រាបអំពី សកម្មភាព របស់សហព័ន្ធខ្មែរកម្ពុជាក្រោមកាន់តែច្បាស់ ។
មានក្មួយមួយចំនួនមានសេចក្ដីក្លាហានបានផ្ញើសេចក្ដីរាយការណ៍តាមបណ្ដាញសង្គមស្ដីអំពីបញ្ហាការរំលោភសិទ្ធិមនុស្សលើពលរដ្ឋរបស់យើង ។ សហព័ន្ធខ្មែរកម្ពុជា ក្រោម បានយកព័ត៌មានទាំងនោះ ទៅជូនមន្ត្រីមានសមត្ថកិច្ចនៃអង្គ ការសហប្រជាជាតិ និងប្រទេសដែលស្រឡាញ់ យុត្តិធម៌ នៅលើពិភពលោក ។ រដ្ឋាភិបាលវៀតណាមគ្មានវិធី សាស្ត្រសម្រាប់បិទបាំងនូវការរំលោភសិទ្ធិមនុស្សលើ ពលរដ្ឋខ្មែរក្រោមទៀតទេ និងមិនចាត់ទុកសហព័ន្ធខ្មែរកម្ពុជា ក្រោម ថាជាជាក្រុមប្រតិកិរិយាដើម្បីបំបែកបំបាក់រវាង ជនជាតិនិងជនជាតិ នៅក្នុងវៀតណាមបានទេ ។
ប្រសិនបើ សហព័ន្ធខ្មែរកម្ពុជាក្រោម ជាអង្គការមួយដែលមិនស្របច្បាប់ ដូចអ្វីដែលវៀតណាមបាននិយាយ នោះ ម្ល៉ោះសម ប្រទេសមហាអំណាចនានា ដូចជា សហរដ្ឋអាមេរិក កាណាដា អូស្ត្រាលី និង សហភាពអ៊ឺរ៉ុប ជាពិសេស អង្គការសហប្រជាជាតិ នឹងមិនអនុញ្ញាតឲ្យខ្មែរក្រោមបានថ្លែងការណ៍ ស្ដីពីបញ្ហាវៀតណាមរំលោភសិទ្ធិមនុស្ស លើ ខ្មែរក្រោមទេ ។ នោះជាការពិតដែលបក្សកុម្មុយនិស្តវៀតណាមមិនចង់ឃើញទេ ។ រដ្ឋាភិបាលវៀតណាមរក គ្រប់ មធ្យោបាយដើម្បីរារាំងមិនឲ្យសហព័ន្ធខ្មែរកម្ពុជាក្រោម បានចូលថ្លែងការណ៍នៅ ក្នុងវេទិកាអចិន្ត្រៃយ៍នៃអង្គការ សហ ប្រជាជាតិស្ដីពីបញ្ហាជនជាតិដើម (UNPFII) នាបុរី New York ជារឿងរាល់ឆ្នាំ ។ វៀតណាមបានបដិសេធខ្មែរ ក្រោមនៅកម្ពុជាក្រោមថា មិនមែនជាជនជាតិដើមទេ ហើយបានប្រឆាំងចំពោះវត្តមានរបស់សហព័ន្ធ ខ្មែរកម្ពុជា ក្រោមថា មិនមានសិទ្ធិតំណាងឲ្យពលរដ្ឋខ្មែរក្រោមនៅដែនដីកម្ពុជាក្រោម នៅក្នុងអង្គការសហប្រជាជាតិឡើយ ។ ទោះបីភាគីវៀតណាមប្រឆាំងដោយគ្មានមូលហេតុយ៉ាងណាក៏ដោយ តែអង្គការសហប្រជាជាតិនៅតែអនុញ្ញាតឲ្យ សហព័ន្ធខ្មែរកម្ពុជាក្រោម ចូលថ្លែងការណ៍ជារៀងរាល់ឆ្នាំ ព្រោះវៀតណាមបំបិទមាត់ខ្មែរក្រោមនៅកម្ពុជាក្រោម មិន ឲ្យមានសំឡេង ហើយមានតែសហព័ន្ធខ្មែរកម្ពុជាក្រោមនៅក្រៅប្រទេសទេ ដែលមានអាចមានលទ្ធភាព ពាំនាំ បញ្ហា ដែលវៀតណាមរំលោភសិទ្ធិលើពលរដ្ឋខ្មែរក្រោម ទៅថ្លែងការណ៍នៅក្នុងអង្គការសហប្រជាជាតិ ។
ក្មួយៗមានការសង្ស័យថា ហេតុអ្វីបានជាប៉ុន្មានឆ្នាំមកនេះ វៀតណាមមានការយកចិត្តទុកដាក់លើខ្មែរក្រោមទេ ? ហេតុអ្វីពួកគេត្រូវចំណាយលុយរាប់លានដូល្លារសម្រាប់ជួយដល់ពលរដ្ឋខ្មែរក្រោមយើង ។ នោះមកពីពួកគេខ្លាចការ ពិត ។ វៀតណាមគិតថា ប្រសិនបើពួកគេឲ្យលុយ ឲ្យបុណ្យសក្ដិ៍បន្តិបន្តួចដល់ពលរដ្ឋខ្មែរក្រោមយើង ៗនឹងភ្លេចនូវ អ្វីដែលបានពួកគេបានធ្វើមកលើខ្មែរក្រោមយើង ។ គេគិតថា យើងនឹងជាប់ជំពាក់គុណគេ ។ ដូច្នេះហើយ បានជា ប៉ុន្មានឆ្នាំមកនេះ ក្មួយៗពិតជាបានឮនូវពាក្យឃោសនារបស់រដ្ឋាភិបាលបក្សកុម្មុយនិស្តវៀតណាមច្រំដែលៗថា ៖
• ជីវភាពរបស់ពលរដ្ឋខ្មែរក្រោមយើងមានការរីកចម្រើនជាលំដាប ។
• រដ្ឋាភិបាលបានសង់ផ្ទះមេត្តាធម៌ជូនដល់គ្រូសារក្រីក្រ ។
• រដ្ឋាភិបាលចាត់តាំងពិធីប្រណាំងទូក ង នៅខេត្តឃ្លាំង និងមាត់ជ្រូក ។
• និង ចាត់តាំងកម្មវិធីបុណ្យប្រពៃណីខ្មែរមួយចំនួនទៀត ។
ក្មួយៗគិតមើល ប្រសិនបើ ក្មួយៗមានសេរីភាពដូចប្រទេសនៅលោកខាងលិច ក្មួយៗនឹងមានសិទ្ធិសម្រេចវាសនា ធ្វើនូវអ្វីដែលក្មួយចង់ធ្វើ ក្មួយៗនឹងមានលទ្ធភាពគ្រប់គ្រាន់ក្នុងការដឹកនាំរៀបចំពិធីបុណ្យប្រពៃណីផ្សេងៗ ដោយ មិនចាំបាច់មានការជ្រៀតជ្រែកពីរដ្ឋាភិបាលវៀតណាមឡើយ ដែលវាធ្វើឲ្យក្មួយៗមានសេចក្ដីរីករាយខ្លាំងជាងអ្វី ដែលរដ្ឋាភិបាលវៀតណាមរៀបចំសព្វថ្ងៃរាប់ពាន់ដង ។ កាលពីសម័យដើម ពលរដ្ឋខ្មែរក្រោមមិនចាំបាច់មានអ្នក ណាមកដឹកនាំរៀបចំកម្មវិធីបុណ្យប្រពៃណីជំនួសយើងទេ យើងធ្វើដោយខ្លួនយើង មិនចាំបាច់សុំច្បាប់អ្នកណាទេ ទោះបីពេលនោះ នៅមិនទាន់មានមធ្យោបាយប្រើប្រាស់ទំនើបដូចសព្វថ្ងៃនេះ ក៏ដោយ តែរាល់កម្មវិធីបុណ្យ ប្រពៃណីរបស់ខ្មែរក្រោមយើងមានភាពសប្បាយរីករាយខ្លាំងណាស់ ។ ម្យ៉ាងទៀត ពលរដ្ឋខ្មែរក្រោមយើង ធ្វើដោយ ខ្លួនឯង មិនចាំបាច់មានអ្នកជួយទេ ហើយជីវភាពរស់នៅវិញ ក៏សម្បូរណ៍សប្បាយផងដែរ ។
បច្ចុប្បន្ននេះ ទោះបីរដ្ឋាភិបាលវៀតណាមអះអាងថា ខ្លួនបានយកចិត្តទុកដាក់លើខ្មែរក្រោមយ៉ាងណាក៏ដោយ មានតែក្មួយៗមួយចំនួនដែលគ្រួសារធូរធាប៉ុណ្ណោះដែលមានលទ្ធភាពចូលរៀននៅសាលាមហាវិទ្យាល័យ ពេល រៀនចប់រកការងារធ្វើមិនបានទៀត ។ មួយភាគធំ នៃសិស្សខ្មែរក្រោមត្រូវបោះបង់ចោលសាលា ឆ្ងាយពីម្ដាយឱពុក ធ្វើចំណាកស្រុកទៅស្វែងរកការធ្វើនៅតាមរោងចក្រ ។ ពីហេតុនោះហើយ បានធ្វើឲ្យក្មួយៗឆ្ងាយពីវប្បធម៌ ប្រពៃណី ជាតិខ្លួនបន្តិចម្ដងៗ និងភាសារបស់ខ្លួនក៏និយាយលែងបានដែរ ។ អ៊ំឈឺចាប់ណាស់ ពេលដែលសរសេរលិខិត នេះជូនដល់ក្មួយៗ ចាំបាច់ត្រូវសរសេរប្រែទៅជាភាសាយួនមួយទៀត ។
ក្មួយៗជាទីមេត្រី ពលរដ្ឋខ្មែរក្រោមទាំងអស់នៅក្រៅប្រទេសបានចូលរួមជាមួយ សហព័ន្ធខ្មែរកម្ពុជាក្រោម ក្នុង គោលបំណងធ្វើយ៉ាងណាឲ្យក្មួយៗ និងពលរដ្ឋខ្មែរក្រោមបានទទួលសិទ្ធិជាមូលដ្ឋាន ដែលបានដាក់បញ្ចូលក្នុង សេចក្ដីប្រកាសរបស់អង្គការសហប្រជាជាតិស្ដីពីសិទ្ធិជនជាតិដើម ដែលរដ្ឋាភិបាលវៀតណាមជាប្រទេសហត្ថ លេខី ។ ដូច្នេះ ក្មួយៗទាំងអស់ត្រូវប្រកបដោយគំនិតភ្លឺស្វាងដឹងច្បាស់ការពិត ចៀសវាងលង់ក្នុងគោលនយោបាយ ឃោសនាបំភ័ន្តសតិមនុស្សជាតិ ។ ក្មួយៗគួរពន្យល់ដល់មន្រី្តខ្មែរក្រោមនៃរដ្ឋាភិបាលបក្សកុម្មុយនិស្តវៀតណាម អំពី អ្វីដែលអ៊ំបានសរសេរក្នុងសារលិខិតនេះ ដើម្បីពួកគាត់យល់ថា ពលរដ្ឋខ្មែរក្រោមនៅក្រៅប្រទេសបាន ចូលរួម ជាមួយសហព័ន្ធខ្មែរកម្ពុជាក្រោម គ្មាននរណាម្នាក់មានគំនិតដណ្ដើមអំណាច ដូចពួកគេបានឃោសនា នោះទេ ។
ក្នុងនាមយើងជាខ្មែរក្រោមទាំងអស់ ប្រសិនបើមិនបានជួយអ្វីសោះដល់ពលរដ្ឋយើង មេត្តាកុំជួយដល់គេធ្វើការ គាបសង្កត់មកលើពលរដ្ឋខ្លួនឯង ។ ផ្ទុយទៅវិញ ប្រសិនបើជាបក្សកុម្មុយនិស្តយួនពិតជាល្អ ជាមួយពួកមន្ត្រីដែល មានកំណើតជាខ្មែរក្រោមនោះ ពេលដែលមន្ត្រីវៀតណាមកំណើតខ្មែរក្រោមចេញទៅធ្វើទស្សនកិច្ចនៅក្រៅប្រទេស រដ្ឋាភិបាលវៀតណាមមិនចាំបាច់ដាក់មនុស្សតាមឃ្លាំមើលជាប់មិនដាច់នោះទេ ។ ក្មួយៗនិយាយប្រាប់ពួកគេទៅ គាត់នឹងយល់ ហើយពួកគេអាចនិយាយកុហក់យើង ប៉ុន្តែមិនអាចកុហក់ខ្លួនឯងបានឡើយ ជាពិសេសពួកគាត់ ក៏ជាខ្មែរក្រោម ដែរ ។
ក្មួយៗត្រូវចាំថា ជាទូទៅខ្មែរក្រោមយើង គោរពជំនឿព្រះពុទ្ធសាសនា យើងមិនប្រព្រឹត្តអំពើហិង្សា មិនប្រើកម្លាំង បាយ មិនចងគំនុំ យើងគ្រាន់តែអំពាវនាវឲ្យរដ្ឋាភិបាលវៀតណាមគោរពសិទ្ធិមនុស្ស ។ ដូច្នេះ ក្មួយៗមិនត្រូវ ភ័យខ្លាច ពីការ បញ្ចេញមតិរបស់ខ្លួនឡើយ ។ វៀតណាមបានចូលជាសមាជិកពេញសិទ្ធិរបស់អង្គការ សហប្រជា ជាតិទទួលបន្ទុក សិទ្ធិមនុស្ស ហើយក៏ជាពេលវេលាដែលវៀតណាមត្រូវតែគោរពសិទ្ធិមនុស្សនៅក្នុងប្រទេស វៀត ណាម ។
ជាអវសាន អ៊ំសូមប្រសិទ្ធិពរជូនដល់ក្មួយៗ ព្រមទាំងគ្រួសារបានទទួលនូវសំណាងល្អក្នុងឆ្នាំថ្មី និងសិទ្ធិមនុស្ស ពេញលេញនៅលើដែនដីកំណើតរបស់ខ្លួន ។
ពីខ្ញុំ
ចៅ រៀប
ប្រធានសភាព្រឹទ្ធាចារ្យនៃសហព័ន្ធខ្មែរកម្ពុជាក្រោមពិភពលោក
