បុរសម្នាក់ស្លាប់ ក្រោយផ្តល់សម្ភាសន៍ទាក់ទង នឹងការស្លាប់ដ៏អាថ៍កំបាំងរបស់កូនគាត់ នៅក្នុងបន្ទាយទាហានយួន
ដោយ ស៊ឺន ចែងចើន
លោក ហ្វិញ សាញ់ ត្រូវជាឪពុករបស់លោក ហ្វិញ ចុង ដែលស្លាប់ដោយអាថ៌កំបាំង នៅក្នុងបន្ទាយទាហានយួន កាលពីថ្ងៃ ២៩ ខែវិច្ឆិកា ២០១៩ នោះ បានទទួលមរណៈភាព នៅព្រឹកថ្ងៃទី ៧ ខែមេសា ២០២០ វេលាម៉ោង ៤ ទាបភ្លឺ ក្នុងជន្មាយុ ៤៣ ឆ្នាំ ដោយមិនទាន់ដឹងមូលហតុច្បាស់លាស់ នៅឡើយទេ ។
ប្រភពព័ត៌មានពីក្រុមគ្រួសារ បានឲ្យដឹងថា លោក ហ្វិញ សាញ់ ដេកស្លាប់ក្នុងផ្ទះរបស់លោក ។ បើតាមសាច់ញាតិរបស់សព បញ្ជាក់ថា នៅព្រឹកថ្ងៃដដែលនេះ ប្រពន្ធរបស់គាត់បានក្រោកឡើង ដើម្បីដាំបាយយកទៅប្រគេនព្រះសង្ឃនៅវត្ត ដែលត្រូវជាថ្ងៃសីលផងនោះ ។ ប៉ុន្តែ គ្រួសាររបស់គាត់មិនបានចាប់អារម្មណ៍ថា ប្តីរបស់គាត់ដេកស្លាប់ឡើយ ដោយមើលឃើញប្តីរបស់គាត់ហាក់ ដូចកំពុងដេកលង់លក់ដូច្នេះ ក៏មិនបានដាសឲ្យក្រោកឡើង ដើម្បីទៅវត្តជាមួយ នឹងប្រពន្ធរបស់គាត់ទេ ។ បន្ទាប់មក ប្រហែលជាម៉ោង ៨ ព្រឹក មិត្តភក្តិរួមការងាររបស់លោក ហ្វិញ សាញ់ បានមកហៅទៅធ្វើការ ប៉ុន្តែ ហៅមិនក្រោកឡើង ក៏ទៅស្ទាបលើដងខ្លួន ទើបដឹងថា លោក ហ្វិញ សាញ់ បានស្លាប់ទៅហើយ ។
គួរជម្រាបជូនថា ការស្លាប់របស់លោក ហ្វិញ សាញ់ គឺកើតឡើងក្រោយមួយសប្តាហ៍ បន្ទាប់ពីលោកបានផ្តល់បទសម្ភាសន៍ជាមួយ នឹងទូរទស្សន៍ ព្រៃនគរ និងវិទ្យុសំឡេងកម្ពុជាក្រោម នៅថ្ងៃ ២៩ ខែមីនា ឆ្នាំ ២០២០ អំពីករណីអាជ្ញាធរយួនអញ្ជើញគ្រួសារលោក ឲ្យទៅយកលទ្ធផលនៃការធ្វើកោសល្យវិច័យសាកសពកូនរបស់គាត់ ឈ្មោះ ហ្វិញ ចុង (Huynh Chung) ជាយុវជនខ្មែរក្រោម ដែលត្រូវស្លាប់ដ៏ចម្រូងចម្រាស់ នៅក្នុងបន្ទាយទាហាន កាលពីថ្ងៃទី ២៩ ខែវិច្ឆិកា ឆ្នាំ ២០១៩ កន្លងទៅនេះ ។ តែពេល លោក ហ្វិញ សាញ់ ទៅដល់ អាជ្ញាធរ យួនមិនបានផ្ដល់លិខិតលទ្ធផលធ្វើកោសល្យវិច័យដល់គ្រួសារគាត់ទេ គ្រាន់តែអានត្រួសៗ ឲ្យស្ដាប់ថា យុវជនឈ្មោះ ហ្វិញ ចុង ស្លាប់ដោយសារជំងឺគាំងបេះដូង ឬ ដាច់សរសៃឈាម ដូចអ្វីដែលអាជ្ញាធរយួនបានអះអាងកាលពីមុនដដែល ។
ក្នុងបទសម្ភាសន៍ដដែលនោះ លោក ហ្វិញ សាញ់ បានឲ្យដឹងថា ក្រោយពីការស្លាប់កូនប្រុសរបស់លោកជាង ៤ ខែកន្លងមកនេះ រដ្ឋាភិបាលយួន នៅមិនទាន់ផ្ដល់ជាសំណងរដ្ឋប្បវេណីឲ្យបានគ្រប់គ្រាន់ ដូចអ្វីដែលខ្លួន បានសន្យាដល់គ្រួសាររបស់លោកនៅឡើយ ។
សូមបញ្ជាក់ថា កាលពីចុងឆ្នាំ ២០១៩ កន្លងទៅនេះ យុវជនខ្មែរក្រោមម្នាក់ ឈ្មោះ ហ្វិញ ចុង បានចូលធ្វើជាទាហានយួន នៅក្នុងបន្ទាយយោធភូមិភាគទី ៩ នៃកងទ័ពប្រជាជនវៀតណាម ឬ ក្វឹងឃូជិន (Quan Khu 9) នាខេត្តដុងថាប (ខេត្តផ្សាដែក) ហើយត្រូវស្លាប់យ៉ាងអាថ៌កំបាំង ដោយសាកសពរបស់យុវជនជនរងគ្រោះ ត្រូវទាហានយួនវះកាត់ តាំងពីពោះដល់ក និងក្បាល ព្រមទាំងមានស្នាមជាំពេញដងខ្លួនផង ។ ក្រុមគ្រួសារសព និងអ្នកប្រើបណ្ដាញសង្គម Facebook បានដាក់ការសង្ស័យថា យុវជនរូបនេះ អាចត្រូវគេសម្លាប់ ហើយបានថ្កោលទោសចំពោះទង្វើរបស់ក្រុមទាហានយួន និងទាមទារឲ្យមានការស៊ើបអង្កេត និងបកស្រាយឲ្យបានច្បាស់លាស់នូវករណីស្លាប់ដ៏អាថ៌កំបាំងនេះ ៕
