ដោយ ថាច់ ប្រីជា គឿន | ទស្សនៈ សារព័ត៌មាន ព្រៃនគរ | ចុះផ្សាយនៅក្នុងកាសែត ព្រៃនគរ លេខ ២៩ ឆ្នាំ ២០១២ | ចេញផ្សាយ ថ្ងៃទី ០១ ខែមករា ឆ្នាំ ២០១២
សាធារណរដ្ឋសង្គម និយមវៀតណាមមានបាវចនាជាតិថា ឯករាជ្យ សេរីភាព សុភមង្គល បាវចនាជាតិនេះ ត្រូវបានបក្យកុម្មុយនិស្តវៀតណាម យកទៅអនុវត្តបោកប្រាស់ខ្មែរក្រោមជាយូរមកហើយ ។ កាលពីខ្មោច ហូ ជី មិញ មិនទាន់ស្លាប់ គាត់តែងតែបាននិយាយជាញឹកញាប់ថា “គ្មានអ្វីប្រសើរជាងឯករាជ្យសេរីភាពឡើយ” ។
ដោយស្មានថា ឯករាជ្យ និង សេរីភាព គឺជារបស់ខ្មែរក្រោម ពេលដែលបាន ឈ្នះបារាំង និងអាមេរិកកាំង ព្រះសង្ឃនិងប្រជាពលរដ្ឋខ្មែរក្រោមជាច្រើនរូប និងអង្គបានចូលរួមធ្វើបដិវត្តន៍ ជាមួយយួនកុម្មុយនិស្តដែលមាន ហូ ជី មិញ ជាប្រធាន ដើម្បីរំដោះដែន ដីកម្ពុជាក្រោម ។ ទីបំផុត ក្រោយថ្ងៃ ៣០ ខែមេសា ឆ្នាំ ១៩៧៥ ពួកកុម្មុយនិស្តវៀតណាម បានឈ្នះរបបសាធារណរដ្ឋ វៀតណាម ដែលការឈ្មះនេះ តាមការអះអាងរបស់រដ្ឋាភិ បាលវៀតណាមសព្វថ្ងៃថា ជាថ្ងៃរំដោះភាគខាងត្បូងនោះ សេរីភាព និង ឯករាជ្យ ត្រូវបានទៅជនជាតិយួន ដែនដីកម្ពុជាក្រោមត្រូវ បានផ្លាស់ការគ្រប់គ្រងពីរបបយួនសេរីមកជារបបយួនកុម្មុយនិស្តវិញ។
ពេលរបបសាធារណរដ្ឋវៀតណាមបានដួលរលំនៅថ្ងៃ ៣០ ខែមេសា ឆ្នាំ ១៩៧៥ ភ្លាម យួនបានលើកទង់ជាតិយួនកម្មុយនិស្តឡើង ព្រោងព្រាតពេញដែនដីកម្ពុជាក្រោម ដើម្បីអបអរសាទរទិវាដ៏ជោគជ័យរបស់គេ ដែលបានលេបទឹកដីកម្ពុជាក្រោម និងមិនយូរប៉ុន្មានទីក្រុង ព្រៃនគរ ដែលយួនសេរីធ្លាប់ហៅថា សាយហ្គន (Sai Gon ) នោះ ត្រូវបានប្តូរទៅជាទីក្រុង ហូ ជី មិញ វិញ ។
ស្ថិតក្នុងស្ថានភាព ដ៏ខ្មៅងងឹតបែបនេះព្រះសង្ឃ និង ប្រជាពលរដ្ឋខ្មែរក្រោមដែលធ្លាប់ចូលរួមបដិវត្ត ជាមួយយួនកុម្មុយនិស្តនោះ ត្រូវបានខកបំណងនិងយំមិនចេញទឹកភ្នែក ព្រោះបានចាញ់បោកយួនមួយក្តារយ៉ាងធ្ងន់ និងត្រូវបានឋិតនៅក្រោមនឹមអាណានិមយួន កុម្មុយនិស្តមួយ តម្រួតទៀត ។
ក្រោយពេលយួនកុម្មុយនិស្ត ចូលកាន់កាប់ដែនដីកម្ពុជាក្រោមនោះ ពួកគេមិនត្រឹមតែ មិននឹកគុណដល់ពលិកម្ម របស់ខ្មែរក្រោមដែលបានពលីជីវិតនៅក្នុងសមរភូមិប៉ុណ្ណោះទេ គឺពួកគេថែមទាំងបានចាប់ព្រះសង្ឃ និងពលរដ្ឋខ្មែរក្រោមដាក់ពន្ធនាគារ និងយកទៅសម្លាប់ទៀតផង ។
ដូច្នេះ ឯករាជ្យ សេរីភាព សុភមង្គល សព្វថ្ងៃ ជារបស់ជនជាតិយួនទេ មិនមែនជារស់ខ្មែរក្រោមឡើយ ។ រដ្ឋាភិបាលវៀតណាមយកពាក្យ នេះមកប្រើ គ្រាន់តែជាការឡប់ឡែដើម្បីត្រួតត្រាខ្មែរក្រោមជាជនជាតិដើមនៃដែនដីកម្ពុជាក្រោម និងជនជាតិភាគតិចផ្សេងៗទៀត នៅក្នុងប្រទេសវៀតណាមតែប៉ុណ្ណោះ ។ ដរាបណាយើងមិនមានសិទ្ធិសម្រេច វាសនាខ្លួនដោយឯង ឬ មិនមានភាពម្ចាស់ការលើខ្លួនឯងទេ ខ្មែរក្រោមមិនមានសេរីភាព និង សុភមង្គលឡើយ ៕
