ដោយ ថាច់ ប្រីជា គឿន l សារព័ត៌មាន ព្រៃនគរ
ភ្នំពេញ- ក្រោយពីមានការចរចាមួយ ជាមួយនឹងមន្ត្រីសាលាក្រុងភ្នំពេញ កាលពីថ្ងៃម្សិលមិញ តំណាងអ្នកតវ៉ាបានប្រកាសថា នឹងធ្វើការតវ៉ានៅមុខស្ថានទូតវៀតណាម នៅថ្ងៃទី ២២ ខែកក្កដា នេះទៀត ដើម្បីដាក់ញត្តិជូនស្ថានទូតវៀតណាម ។ការប្រកាសនេះ ធ្វើឡើងមុនពេលក្រុមអ្នកតវ៉ាជាងមួយម៉ឺននាក់បានរំសាយនៅវេលាម៉ោង ៤ និង ៣០ នាទី រសៀល ថ្ងៃទី ២១ ខែកក្កដា បន្ទាប់ពីមន្ត្រីស្ថានទូតវៀតណាមមិនព្រមចេញទទួលញត្តិរបស់ពួកគេ ។
មន្ត្រីស្ថានទូតវៀតណាម ប្រចាំកម្ពុជា មិនព្រមចេញមុខមកទទួលញត្តិពីអ្នកតវ៉ាទេ ហើយបានជម្រុញឲ្យអ្នកតវ៉ា យកញត្តិនោះទៅដាក់នៅសាលាខណ្ឌចម្ការមនជំនួសវិញ ក៏ប៉ុន្តែអ្នកតវ៉ាមិនព្រម ក៏បានបន្តតវ៉ានៅក្បែរ ស្ថានទូត នោះតទៅទៀត រហូតដល់ម៉ោង ៤ កន្លះទើបរំសាយ ហើយប្រកាសថា នឹងធ្វើការតវ៉ានៅថ្ងៃទី ២២ ខែកក្កដា នេះទៀត ។ ការបដិសេធមិន ទទួលញត្តិនេះ ខណៈដែលសហព័ន្ធនិស្សិតបញ្ញវន្តកម្ពុជា បានដឹកនាំពលរដ្ឋជាងមួយម៉ឺននាក់ នៅថ្ងៃទី ២១ ខែកក្កដា បានហែក្បួនតាមដងផ្លូវក្នុងទីក្រុងភ្នំពេញ ដើម្បីដាក់ញត្តិជូនស្ថានទូតប្រទេសចំនួន ៦ ក្នុងនោះ មាន ស្ថានទូតបារាំង ចក្រភពអង់គ្លេស សហរដ្ឋអាមេរិក សហគមន៍អឺរ៉ុប រុស្ស៊ី ចិន និងស្ថានទូតវៀត ណាម ដើម្បីទាមទារឲ្យវៀតណាមទទួលស្គាល់ការ ពិតប្រវត្តិសាស្ត្រដែនដីកម្ពុជាក្រោម និងសុំទោសប្រជាពល រដ្ឋខ្មែរជាសាធារណៈ ចំពោះការលើកឡើងដោយបំពានរបស់អ្នកនាំពាក្យស្ថានទូតវៀតណាមថា ទឹកដីកម្ពុជា ក្រោមជា របស់វៀតណាម តាំងពីយូរយារណាស់មកហើយ ហើយថាបារាំងមិន បានកាត់ទឹកដីនេះ ទៅឲ្យវៀត ណាមទេ ។
លោក សឺន ជុំជួន ប្រធានបណ្ដាញយុវជនខ្មែរកម្ពុជាក្រោម ដែលមានមូលដ្ឋាននៅកម្ពុជា បានប្រាប់វិទ្យុសំឡេង កម្ពុជាក្រោម នៅមុខស្ថានទូតវៀតណាម នៅថ្ងៃទី ២១ ខែកក្កដា ម្សិលមិញថា នៅថ្ងៃនេះទី ២២ ខែកក្កដា វេលាម៉ោង ៨ ព្រឹក ពួកគាត់នឹង មកប្រមូលផ្ដុំគ្នានៅមុខស្ថានទូតវៀតណាមសាជាថ្មី ។
លោក សឺន ជុំជួនបានបញ្ជាក់ថា ៖
“ដូច្នេះ ដើម្បីការងាយស្រួល បង្កលក្ខណៈលំបាក់ដល់បងប្អូនយើងនៅពេលយប់ទៀត ចឹងយើង បាន សម្រេចចរចាជាមួយនឹងសាលាក្រុងរាជធានីភ្នំពេញនឹងថា ស្អែកហ្នឹងម៉ោង ៩ ព្រឹក ពួកយើង នឹងទៅចរចាជាមួយពួកគាត់ ដោយមានក្រសួងការបរទេស [ខ្មែរ] ចូលរួមផងដែរ ។ ហើយយើង ចរចានេះ ដោយសារខាងសាលា ក្រុងគាតធានាធានាថា ញត្តិរបស់យើងហ្នឹងត្រូ វដល់ដៃស្ថានទូត វៀតណាម ។ ចឹងហើយ យើងនឹងប្រកាសថា នឹង រំសាយនៅពេលនេះ ថ្ងៃស្អែកម៉ោង ៨ ព្រឹក ប្រជា ពលរដ្ឋគាត់នឹងមកប្រមូលផ្ដុំគ្នានៅកន្លែងទូតវៀតណាមហ្នឹងទៀត ហើយយើងនឹងទៅចរចា ជា មួយនឹងសាលារាជធានីភ្នំពេញ ។ បានលទ្ធផលយ៉ាងយើងនឹងពាំនាំមកជូនគាត់នៅ ពេលហ្នុង ” ។
លោក ម៉ៅ ពិសេស ប្រធានសហព័ន្ធនិស្សិតបញ្ញវន្តកម្ពុជា បានថ្លែងនៅមុខស្ថានទូតវៀតណាម ប្រាប់អ្នកកាសែត ថា ក្រុមអ្នកតវ៉ាមិនត្រូវការអ្វីទេ ដោយពួកគេគ្រាន់តែចង់ឃើញអ្នកនាំពាក្យស្ថានទូតវៀតណាម សុំទោសពល រដ្ឋខ្មែរ ជាសាធារណៈ តែប៉ុណ្ណោះ ។
លោក ម៉ៅ ពិសេស ថ្លែងថា៖
“ដើម្បីឲ្យទទួលស្គាល់ការពិតនៃប្រវត្តិសាស្ត្រ វាមិនពាក់ព័ន្ធទៅនឹងការរើសអើងជាតិសាសន៍ណា នោះទេ ។ ចឹងទេ មន្ត្រីស្ថានទូតវៀតណាមត្រូវមានភាពក្លាហាន គឺគាត់គ្រាន់តែសុំទោសជា សាធារណៈ គឺវាចប់រឿងហើយ ” ។
នេះជាការជួបជុំគ្នាលើកទី ២ នៅមុខស្ថានទូតវៀតណាម ប្រចាំទីក្រុងភ្នំពេញ បន្ទាប់ពីពួកគេបានប្រមូលផ្ដុំគ្នាម្ដង រួចហើយ នៅថ្ងៃទី ៨ ខែកក្កដា កន្លងទៅនេះ ។ ក្រោយពីការធ្វើបាតុកម្មលើកទី ១ មួយថ្ងៃ គឺនៅថ្ងៃទី ៩ ខែកក្កដា លោក ត្រឹង វ៉ាំង ថុង បានថ្លែងប្រាប់ BBC បញ្ជាក់ពីគោលជំហររបស់ខ្លួនទៅលើបញ្ហាដែនដីកម្ពុជាក្រោម សាជា ថ្មីថា “ ភាគខាងត្បូង [វៀតណាម] ជាដែនដីមិនអាចកាត់ផ្ដាច់ចេញពីប្រទេសវៀតណាមបានទេ” ។ លោកបន្តថា ដែនដីកម្ពុជាក្រោម ដែលលោកហៅថា ណាមបូវៀតណាមនោះ “ត្រូវបានអន្តរជាតិ ក្នុងនោះ ប្រទេសកម្ពុជាខ្លួន ឯង ក៏បានទទួលស្គាល់” ថាជារបស់វៀតណាម ផងដែរ ។
លោក ត្រឹង វ៉ាំង ថុង អ្នកនាំពាក្យស្ថានទូតវៀតណាម បានប្រាប់វិទ្យុអាស៊ីសេរី កាលពីថ្ងៃទី ០៦ ខែមិថុនា ឆ្នាំ២០១៤ ថា “ បារាំងមិនបានកាត់ទឹកដីកម្ពុជាក្រោមឲ្យវៀតណាមទេ តែកម្ពុជាក្រោមជាទឹកដីរបស់ វៀតណាម តាំងពីយូរយារណាស់មកហើយ ព័ត៌មានបាត់បង់ទឹកដីគ្មានអ្វីជាមូលដ្ឋានទេ គ្មានអ្វីជាភស្តុតាងទេ” ។
យោងតាមប្រវត្តិសាស្ត្រ កម្ពុជាក្រោមជាដែនដីមួយភាគនៃប្រទេសកម្ពុជា ត្រូវបានបារាំងកាត់ផ្ទេរឲ្យវៀតណាម នៅថ្ងៃ ទី ០៤ ខែមិថុនា ឆ្នាំ ១៩៤៩ ។ ក្រោយពីបារាំងបានកាត់ដែនដីកម្ពុជាក្រោមឲ្យវៀតណាម មកដល់ពេលនេះ មានរយៈពេល ៦៥ ឆ្នាំ ហើយ ដែលខ្មែរក្រោមបានក្លាយជាជនជាតិភាគតិចមួយ រស់នៅក្រោមការត្រួតត្រា របស់ របបវៀតណាមមកដល់សព្វថ្ងៃ ៕
Comments are closed.