សេចក្ដីថ្លែងការណ៍
៦៩ ឆ្នាំ ក្រោមនឹមអាណានិគមយួន
ក្ដីសង្ឃឹមនៃសិទ្ធិសម្រេចវាសនាខ្លួនដោយខ្លួនឯង
សូមថ្វាយបង្គំចំពោះព្រះសង្ឃគ្រប់អង្គជាទីគោរពដ៏ខ្ពង់ខ្ពស់ !
សូមគោរពបងប្អូនជនរួមជាតិទាំងអស់ និងសមាជិក សមាជិកា ព្រមទាំងថ្នាក់ដឹកនាំ នៃ សហព័ន្ធខ្មែរកម្ពុជាក្រោមនៅជុំវិញពិភពលោក ជាស្រឡាញ់រាប់អាន !
នៅថ្ងៃទី ៤ ខែមិថុនា ឆ្នាំ ២០១៨ នេះ សាខាសហព័ន្ធខ្មែរកម្ពុជាក្រោមទូទាំងពិភព លោក បានប្រារព្ធពិធីខួប ៦៩ ឆ្នាំ ដើម្បីរំឭកដល់ថ្ងៃដែលបារាំងបានកាត់ដែនដីកម្ពុជាក្រោម ឬ ដែនដីកូស័ងស៊ីន ជាដីខ្មែរមួយភាគធំនៃប្រទេសកម្ពជា ឲទៅវៀតណាមបន្តធ្វើអាណានិគមលើប្រជាជាតិខ្មែរក្រោម ។
សេចក្ដីប្រកាសច្បាប់ លេខ ៤៩-៧៣៣ របស់ប្រធានាធិបតីបារាំង វ៉ែនសង់ អូរិយោល (Vincent Auriol) នៅថ្ងៃទី ០៤ ខែមិថុនា ឆ្នាំ ១៩៤៩ ក្នុងការប្រគល់ដែនដីកម្ពុជាក្រោម ឲទៅជារដ្ឋចំណុះវៀតណាម ជាសន្ធិសញ្ញាខុសច្បាប់មួយញែកដែនដីកម្ពុជាក្រោមឲចេញពីខណ្ឌសីមានៃប្រទេសកម្ពុជា និងបានកាត់វាសនាប្រជាជាតិខ្មែរក្រោមរាប់លាននាក់ឲឃ្លាតចេញពីការគ្រប់គ្រងរបស់រដ្ឋាភិបាលនៃប្រទេសកម្ពុជា ហើយបានក្លាយទៅជាជនជាតិភាគតិចលើដីកំណើតរបស់ខ្លួននៅក្រោមនឹមអាណានិគមថ្មីរបស់វៀតណាម ។
៦៩ ឆ្នាំនៅក្រោមនឹមអាណានិគមរបស់វៀតណាម ប្រជាជាតិខ្មែរក្រោមបានក្លាយទៅ ជាកូនកំព្រាគ្មានមេបាថែរក្សារងទុក្ខឈឺចាប់ខ្លោចផ្សាឥតមានពេលស្រាកស្រាន្ត ។ ព្រះសង្ឃនិង បញ្ញវន្តខ្មែរក្រោមត្រូវចាប់ដាក់ពន្ធនាគារ និងធ្វើទារុណកម្ម ប្រវត្តិសាស្ត្រកម្ពុជាក្រោមត្រូវកែ បំភ្លៃ ដើម្បីលាងខួរក្បាលយុវជនខ្មែរក្រោមឲភ្លេចកំណើតជាខ្មែរ គ្មានសិទ្ធិនៃការបញ្ចេញមតិ និងបង្កើតអង្គការសមាគម និងជីវភាពកាន់ តែក្រីក្រជាដើម ។
ទោះបី ត្រូវក្លាយជាជនជាតិភាគតិច ហើយត្រូវរដ្ឋាភិបាលអាណានិគមយួនធ្វើទុក្ខបុក ម្នេញយ៉ាងណាក៏ដោយ ក៏ពលរដ្ឋខ្មែរនៅកម្ពុជាក្រោម នៅតែខិតខំតស៊ូយ៉ាងស្វិតស្វាញ ដើម្បី ការពារជាតិខ្មែរ និង ពុទ្ធសាសនា ឲបានគង់វង្សរហូតមកដល់សព្វថ្ងៃ ។
ថ្វីបើ ដែនដីកម្ពុជាក្រោម ត្រូវនៅក្រោមនឹមត្រួតត្រារបស់អាណានិគមយួនអស់ ៦៩ ឆ្នាំ ហើយ ក៏ដោយ តែយើងនៅតែមានក្ដីសង្ឃឹមជានិច្ច ដោយសារនៅក្នុងសតវត្សរ៍ទី ២១ នេះ ជាសករាជ នៃ “សិទ្ធិសម្រេចវាសនាខ្លួនដោយខ្លួនឯង” របស់ជនជាតិដើមទូទាំងពិភពលោក ។ សហព័ន្ធខ្មែរកម្ពុជាក្រោមនឹងបន្តធ្វើការតស៊ូដោយសន្តិវិធី និង អហិង្សានៅលើឆាកអន្តរជាតិដើម្បីជំរុញប្រជាជាតិខ្មែរក្រោមនៅក្នុងស្រុកបានស្គាល់ និងចេះប្រើប្រាស់នូវសិទ្ធិជាមូលដ្ឋានរបស់ខ្លួនហើយ ឈានទៅរក “សិទ្ធិសម្រេចវាសនាខ្លួនដោយខ្លួនឯង” ក្នុងនាមជាជនជាតិដើមនៃដែនដីកម្ពុជាក្រោម ។
សូមឲថ្ងៃប្រវត្តិសាស្ត្រដ៏ឈឺចាប់នេះ ក្លាយទៅមេរៀនសម្រាប់ថ្នាក់ដឹកនាំ និងប្រជាជាតិ ខ្មែរគ្រប់ជំនាន់នៅក្នុងប្រទេសកម្ពុជាឲចេះការពារជាតិ និង ទឹកដីរបស់ខ្លួនកុំឲបាត់បង់ទៅ បរទេសតទៅទៀត ។ ទិវាដ៏ឈឺចាប់នេះ នឹងក្លាយទៅកម្លាំងចិត្តស្នេហាជាតិដ៏មុះមុតឋិតនៅក្នុង សតិអារម្មណ៍របស់ថ្នាក់ដឹកនាំ និង សមាជិកនៃសហព័ន្ធខ្មែរកម្ពុជាក្រោមនៅជុំវិញពិភពលោក ឲបន្តការតស៊ូដោយអហិង្សាតទៅមុខទៀត ដើម្បីនាំមកនូវ សិទ្ធិសេរីភាព យុត្តិធម៌ និង សិទ្ធិ សម្រេចវាសនាខ្លួនដោយខ្លួនឯង ជូនប្រជាជាតិខ្មែរនៅដែន ដីកម្ពុជាក្រោម សព្វថ្ងៃ ។
សូមជនរួមជាតិ ថ្នាក់ដឹកនាំ និងសមាជិក សមាជិកា នៃសហព័ន្ធខ្មែរកម្ពុជាក្រោមទទួល នូវសេចក្ដីគោរពរាប់អានដ៏ខ្ពង់ខ្ពស់ពីខ្ញុំព្រះករុណា ខ្ញុំបាទ ។
សហរដ្ឋអាមេរិក ថ្ងៃទី ៤ ខែមិថុនា ឆ្នាំ ២០១៨
ប្រាក់ សេរីវុឌ្ឍ
ប្រធានប្រតិបត្តិ នៃ សហព័ន្ធខ្មែរកម្ពុជាក្រោម
