ដោយ ថាច់ ប្រីជា គឿន l សារព័ត៌មាន ព្រៃនគរ
វត្តស្វាយសទំនើប ស្ថិតនៅឃុំខ្ទរ ស្រុកស្វាយទង ខេត្តមាត់ជ្រូក ដែនដីកម្ពុជាក្រោម ត្រូវអគ្គិភ័យឆេះសាលាមួយខ្នង នៅព្រឹកថ្ងៃ ២៣ ខែតុលា ឆ្នាំ ២០១៥ រវាងម៉ោង ៤ រំលងអាធ្រាត្រ កន្លងទៅនេះ ។ មន្ត្រីអាជ្ញាធរយួនលើកឡើងថា មូលហេតុនៃការឆេះសាលានេះ អាចមកពីទៀននៅក្នុងសាលានេះត្រូវរលំហើយបណ្ដាលឲ្យឆេះរាលដាល ។ គ្រោះ អគ្គិភ័យនេះ មិនបណ្ដាលឲ្យព្រះសង្ឃ និងពលរដ្ឋរងរបួស ឬ បាត់បង់ជីវិតទេ ។
យោងតាមសារព័ត៌មាន ទូយត្រែ (Tuoi Tre) ដែលជាកាសែតរដ្ឋវៀតណាមបានចេញផ្សាយកាលពីថ្ងៃទី ២៣ ខែតុលា ឆ្នាំ ២០១៥ ថា នៅវេលាម៉ោង ៤ ព្រឹកថ្ងៃទី ២៣ ខែតុលា សាលាឆទានមួយខ្នង នៃវត្តស្វាយសទំនើប ត្រូវឆេះខណៈ ដែលព្រះសង្ឃកំពុងតែសឹង ។ ព័ត៌មាននេះរាយការណ៍ថា ភ្លើងបានឆេះរាលចេញពីទីសក្ការបូជានៅក្នុងសាលា ។
រយៈពេលពីរម៉ោងភ្លើងក៏បានឆេះអស់សាលាមួយខ្នងនេះ នៅសល់តែជញ្ជាំងថ្មតែប៉ុណ្ណោះ បើទោះបីព្រះសង្ឃ និងពុទ្ធ បរិស័ទនៅជុំវិញវត្តមកជួយពន្លត់ភ្លើងយ៉ាងណាក៏ដោយ ។
ព្រះតេជព្រះគុណ ចៅ ទី បានមានពុទ្ធដីកាប្រាប់ សារព័ត៌មាន ទូយទ្រែ (Tuoi Tre) នៃរដ្ឋាភិបាលយួនថា វត្តស្វាយស ទំនើប ជាវត្តពុទ្ធសាសនាថេរវាទខ្មែរដែលមានអាយុកាលយូរយារណាស់មកហើយ ។ ជាពិសេស វត្តនេះកំពុងតែអភិរក្ស សាស្ត្រាស្លឹករឹតរបស់ជនជាតិខ្មែរនៅក្នុងវត្ត ហើយស្លឹករឹតនេះមិនត្រូវឆេះដោយអគ្គិភ័យនេះទេ ។
ព្រះតេជព្រះគុណ មានពុទ្ធដីកាបន្តទៀតថា មុនឆ្នាំ ១៧៧៥ វត្តនេះមានទីតាំងនៅជាប់ជើងភ្នំខ្ទរ តែដោយសារសង្គ្រាម បំផ្លាញ ទើបវត្តបានប្ដូរទីតាំងមកនៅកណ្ដាលវាលស្រែវិញ ។
លោក ដោ មិន ទ្រី (Đỗ Minh Trí) អនុប្រធានគណៈកម្មការប្រជាជនស្រុកស្វាយទង (UBND huyện Tri Tôn) នៃរដ្ឋាភិបាលបក្សកុម្មុយនិស្តយួនបានប្រាប់ កាសែត ទូយត្រែ ថា តាមការវាយតម្លៃរបស់អ្នកជំនាញអាជ្ញាធរយួន មូលហេតុនៃការឆេះនេះ អាចមកពីទៀន នៅក្នុងសាលានេះរលំនៅជិតផ្ទាំងសំពត់ហើយបណ្ដាលឲ្យឆេះ ៕
ខាងក្រោមនេះជារូបថតមួយចំនួនស្ដីពីការឆេះសាលាវត្តស្វាយសទំនើប
Comments are closed.