វៀតណាមឃុំខ្លួនព្រះសង្ឃ និងពលរដ្ឋខ្មែរក្រោមធ្វើបុណ្យកឋិននៅកម្ពុជាក្រោម
ដោយ ថាច់ ប្រីជា គឿន l សារព័ត៌មាន ព្រៃនគរ
អាជ្ញាធរវៀតណាម នៅខេត្តក្រមួនស បានឃាត់ខ្លួនព្រះសង្ឃ និងពលរដ្ឋខ្មែរក្រោមចំនួន ១៣ រូប ខណៈដែលអ្នកទាំងនេះបានធ្វើ ដំណើរពីទីក្រុងភ្នំពេញ នៃប្រទេសកម្ពុជា ទៅធ្វើបុណ្យកឋិនទាន នៅដែនដីកម្ពុជាក្រោម ។ ការឃាត់ខ្លួននេះ ធ្វើឡើងនៅច្រកព្រំដែន វៀតណាម-កម្ពុជា ពេលដែលអ្នកទាំងនេះបានត្រឡប់មកប្រទេសកម្ពុជាវិញ នៅថ្ងៃទី ២៨ ខែតុលា បន្ទាប់ពីខកខានមិនបានធ្វើបុណ្យ កឋិនទានដូចបំណង នៅវត្តខ្វែងទទឹង ភូមិខ្វែងទទឹង (ấp Minh Hưng) ឃុំ ខ្វែងទទឹង (Xã Minh Hòa ) ស្រុក ឃ្លាំងមឿង ( Huyện Châu Thành) ខេត្ត ក្រមួនស (Tỉnh Kiên Giang) ។ ការឃាត់ខ្លួននៅច្រកព្រំដែន អាជ្ញាធរវៀតណាមបានគំរាមឲ្យអ្នកទាំង ១៣ រូបខាងលើចុះហត្ថលេខាលើលិខិតសន្យាមួយថា នឹងមិនចូលរួមសកម្មភាពនយោបាយនៅក្នុងប្រទេសកម្ពុជា ហើយមន្ត្រីអាជ្ញាធរវៀត ណាមបានរឹបយកសម្ភារៈផ្ទាល់ខ្លួនជាច្រើនពីអ្នកទាំងនេះ ទៀតផង ។
ពេលរួចខ្លួនមកដល់ប្រទេសកម្ពុជា ក្រុមព្រះសង្ឃ និងពលរដ្ឋរងគ្រោះខាងលើ បានធ្វើសន្និសីទកាសែតមួយនៅវត្តសាមគ្គីរង្សី ដែល មានមូលដ្ឋាននៅក្នុងទីក្រុងភ្នំពេញ នៅថ្ងៃទី ៣០ ខែតុលា ម្សិលមិញនេះ ដើម្បីជម្រាបព័ត៌មាននេះដល់សាធារណជន និងប្រតិកម្ម ចំពោះទង្វើរំលោភសិទ្ធិមនុស្សពីសំណាក់អាជ្ញាធរវៀតណាម ។
ព្រះតេជព្រះគុណ គឹម សុខា សមណនិស្សិតខ្មែរក្រោម នៅទីក្រុងភ្នំពេញ ដែលមានដើមកំណើតមកពីខេត្តក្រមួនស ជាជនរងសគ្រោះ ក្នុងហេតុការណ៍នេះ បានថ្លែងប្រាប់អ្នកកាសែតនៅក្នុងសន្និសីទកាសែតថា មូលហេតុដែលនាំឲ្យអាជ្ញាធរវៀតណាមឃាត់ខ្លួនក្រុម របស់ព្រះអង្គនោះ ដោយសារ អាជ្ញាធរវៀតណាមបានចោទប្រកាន់លើក្រុមរបស់ព្រះអង្គថា បានជាប់ទាក់ទងនឹងបញ្ហាអ្វីមួយដែល រដ្ឋាភិបាលវៀតណាមចាត់ទុកថាជា “ទង្វើខុសច្បាប់” មួយចំនួនដូចជា ធ្វើដំណើរចូលដែនដីកម្ពុជាក្រោម (ប្រទេសវៀតណាម) ខុសច្បាប់ ចាកចេញពីកម្ពុជាក្រោមខុសច្បាប់ ថតរូបខុសច្បាប់ កាន់ទង់ជាតិខ្មែរកម្ពុជាក្រោមខុសច្បាប់ ការផ្តល់ព័ត៌មានទៅក្រៅ ប្រទេស និងចូលរួមជាមួយសហព័ន្ធខ្មែរកម្ពុជាក្រោម ជាដើម ។
ប្រភពព័ត៌មានមួយដែលវិទ្យុសំឡេងកម្ពុជាក្រោម ទទួលបាននៅថ្ងៃទី ៣០ ខែតុលា ម្សិលមិញនេះ បានបញ្ជាក់ថា ព្រះសង្ឃ និងពលរដ្ឋខ្មែរក្រោមទាំង ១៣ នាក់នេះ បានធ្វើដំណើរពីប្រទេសកម្ពុជាទៅដែនដីកម្ពុជាក្រោម នៅថ្ងៃទី ២៤ និង ២៥ ខែតុលា ឆ្នាំ ២០១៤ ដើម្បីចូលរួមពិធីបុណ្យកឋិនទាន នៅវត្តខ្វែងទទឹង នៅថ្ងៃទី ៣០ ខែតុលា ឆ្នាំ ២០១៤ នេះ ។
ឈ្មោះព្រះសង្ឃ ដែលអាជ្ញាធរវៀតណាមឃុំខ្លួនកាលពីថ្ងៃទី ២៨ ខែតុលា រួមមាន ភិក្ខុ កែវ សោភ័ណវិចិត្រ, ភិក្ខុ គីម វិសាល, ភិក្ខុ គឹម សុខា ត្រូវពិន័យ ពិន័យ ជាង ២ លានដុង ប្រហែល $200, ភិក្ខុ សូរ មុនី ត្រូវពិន័យជាង ១០ លានដុង ប្រហែល $៥០០ និង ភិក្ខុ គីម វុឌ្ឍី ។ ចំណែកពលរដ្ឋជាគ្រហស្ថដែលត្រូវឃុំខ្លួនជាមួយព្រះសង្ឃនោះ រួមមានឈ្មោះ សេរី វង្ស ត្រូវពិន័យប្រហែល ៣០០ $, អៀ វណ្ណនាថ, កុប ចាន់ណាំ, អេង ស្រីហ័ង ត្រូវពិន័យចំនួន ២២៥$ និង ស្រីលក្ខណ៍ ។ ចំណែកក្មេងៗ ៣ នាក់ទៀត រួម មានឈ្មោះ សុដាលីន, អេង មិញហ្វ័ង និង ឈុន អើ ។
ប្រភពព័ត៌មានដដែលបានបញ្ជាក់អំពីសម្ភារៈដែលរបស់ជនរងគ្រោះដែលត្រូវអាជ្ញាធរវៀតណាមរឹបយករួមមាន ទូរស័ព្ទ Galaxy 1 Plus 1 របស់ព្រះតេជព្រះគុណ សូរ មុនី មួយគ្រឿង , ទូរស័ព្ទ Galaxy Pop 1, Note Book 1 របស់ កុប ចាន់ណាំ, ទូរស័ព្ទ Sum sung CS 3 របស់ ព្រះតេជព្រះគុណ កែវ សោភ័ណវិចិត្រ, ទូរស័ព្ទ Sum sung របស់ព្រះតេជព្រះគុណ គឹម សុខា, ទូរស័ព្ទ Sum sung Galaxy CS 3 របស់ លោក សេរី វង្ស, ទូរស័ព្ទ Noxi Xi Note Book 1 Sim 4 និងស្រោមសំបុត្របង្កាន់ដៃបើកលុយរបស់ព្រះតេជព្រះគុណ គឹម វិលាល និង ទូរស័ព្ទ Sum Sung 1 Nokia 1 របស់កញ្ញា ស្រីលក្ខណ៍ ។
យោងតាមលិខិតជូនដំណឹងមកវិទ្យុសំឡេងកម្ពុជាក្រោមដដែល បានបញ្ជាក់អំពីការគំរាមកំហែងរបស់អាជ្ញាធរវៀតណាម មកលើជន រងគ្រោះកុំឲ្យចូលរួមសកម្មភាពនយោបាយ និងសង្គមនៅប្រទេសកម្ពុជាថា ៖
“នរគបាលយួនបានយកក្រដាស និងលិខិតឲ្យសរសេរតាមវាបង្គាប ថា មិនឲ្យចូលរួមសកម្មភាពជាមួយក្រុមខ្មែរក្រោម , គណបក្ស សង្គ្រោះជាតិ (CNRP) , ត្រូវចុះហត្ថលេខា ផ្តិតមេដៃ ហើយរាល់ឯកសារយួនបានរក្សាទុកទាំងអស់ ។ មិនតែប៉ុណ្ណោះយួនបាន គំរាមដល់គ្រួសារ បងប្អូនសាច់ញាតិជនរងគ្រោះដែលកំពុងរស់នៅកម្ពុជាក្រោម ហើយវាឃ្លាំមើលជានិច្ច ។ មួយវិញទៀត បងប្អូន ដែលទៅពីកម្ពុជាត្រូវបានយួនតាមដានគ្រប់ជំហានទាំងអស់ ប្រៀបដូចជាយើងជាអ្នកទោស” ។
ទាក់ទងនឹងការឃាត់ខ្លួនព្រះសង្ឃ និងពលរដ្ឋខ្មែរក្រោមនេះ លោក សឺន ជុំជួន ប្រធានបណ្ដាញយុវជនខ្មែរកម្ពុជាក្រោម ដែលមាន មូលដ្ឋាននៅក្នុងប្រទេសកម្ពុជា បានថ្លែងប្រាប់អ្នកកាសែត នៅក្នុងសន្និសីទកាសែត កាលពីថ្ងៃទី ៣០ ខែតុលា ថា ទង្វើដែលអាជ្ញាធរ វៀតណាមធ្វើនេះ ជាការរំលោភសិទ្ធិមនុស្សមួយយ៉ាងធ្ងន់ ។
រដ្ឋាភិបាលវៀតណាមជារឿយៗ ត្រូវបានសហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិករាយការណ៍ថា បានរំលោភ សិទ្ធិមនុស្សលើជនជាតិដើមខ្មែរក្រោមជាបន្តបន្ទាប់ ។ ការរំលោភសិទ្ធិទាំងនោះ រួមមាន ការចាប់ព្រះសង្ឃផ្សឹកដាក់ពន្ធនាគារ ការ តាមដានសកម្មភាពព្រះសង្ឃ និងហៅព្រះសង្ឃទៅសួរចម្លើយផ្សេងៗជាដើម ៕
Comments are closed.