អាជ្ញាធរយួនកោះហៅក្រុមយុវជនពាក់អាវយឺតរបស់សហព័ន្ធខ្មែរកម្ពុជាក្រោមទៅសួរចម្លើយ
ដោយ ស៊ឺន ចែងចើន| VOKK
អាជ្ញាធរយួន បានចេញលិខិតកោះហៅយុវជនខ្មែរក្រោមមួយក្រុម នៅដែនដីកម្ពុជាក្រោម ទៅសួរចម្លើយ បន្ទាប់ពីពួកគេបានយករូបសញ្ញា (Logo) ដែលបានរចនា និងផលិតដោយគណៈកម្មាធិការយុវជននៃសហព័ន្ធខ្មែរកម្ពុជាក្រោម (KKFYC) មានមូលដ្ឋាន នៅសហរដ្ឋអាមេរិក ទៅបោះពុម្ព ហើយបានចែកចាយគ្នាពាក់ជាសាធារណៈដោយឥតគិតថ្លៃ កាលពីថ្ងៃទី ២២ ខែឧសភា ឆ្នាំ ២០១៧ កន្លងទៅនេះ ។
យោងតាមលិខិតកោះហៅមួយច្បាប់ ដែលបង្គាប់ឲ្យសាមីខ្លួនទៅជួបប្រធានការិយាល័យនគរបាលសន្តិសុខ ស្រុកផ្នោដាច់ លោក សឺង ថាញ់បុត្រ នៅវេលាម៉ោង ១៣ និង ៣០ នាទី ថ្ងៃទី ២៦ ឧសភា ២០១៧ នៅការិយាល័យនគរបាលឃុំមេរងថ្មី ដើម្បីសួរនាំនូវរឿងរ៉ាវមួយចំនួនដែលទាក់ទាង នឹងសាមីខ្លួន ។
យុវជនខ្មែរក្រោមមួយក្រុម មានគ្នា ៤ ទៅ ៥ នាក់ ដែលរងការហៅទៅសួរនាំនោះ បាននាំគ្នាពាក់អាវយឺតបង្ហាញពីអត្តសញ្ញាណ «ខ្មែរក្រោម» ទៅតាមការកោះហៅរបស់អាជ្ញាធរ តាមកាលកំណត់ផងដែរ ។ នេះជាការលើកឡើងរបស់នាង សឺន ស្រី ណែត បញ្ជាក់ប្រាប់វិទ្យុសំឡេងកម្ពុជាក្រោម តាមទូរស័ព្ទ ។
នាង សឺន ស្រី ណែត ដែលត្រូវបានគេស្គាល់ទូទៅតាមរយៈសកម្មភាពរបស់នាងនៅលើបណ្ដាញសង្គមហ្វេសប៊ុក និងជាសកម្មជនប្រឆាំងតវ៉ាទៅអាជ្ញាធរវៀតណាម រឿងរមណីយដ្ឋានស្រះគូ ដែលត្រូវគោក នាពេលកន្លងមក បានថ្លែងប្រាប់វិទ្យុសំឡេងកម្ពុជាក្រោមពីដែនដីកម្ពុជាក្រោមមកថា នាង និងយុវជនខ្មែរក្រោមដែលត្រូវបានហៅទៅសួរនោះ បានទៅដល់ការិយាល័យនគរបាលឃុំមេរងថ្មី តាមការកោះហៅរបស់អាជ្ញាធរយួន ។
នាងស្រី ណែត បានបញ្ជាក់ថា ភ្នាក់ងារអាជ្ញាធរយួន កំពុងសួរចម្លើយក្រុមយុវជនអំពីរឿងបោះពុម្ព និងពាក់អាវយឺតរបស់សហព័ន្ធខ្មែរកម្ពុជាក្រោមនៅឡើយ ខណៈនាង និងមិត្តភក្តិរបស់នាងម្នាក់ទៀត ដែលទៅចូលរួមគាំទ្រ និងលើកទឹកចិត្តដល់ក្រុមយុវជនោះ ត្រូវបានសន្តិសុខយាមនៅច្រកចូលការិយាល័យនគរបាលបណ្តេញចេញមិនឲ្យចូលរួមស្តាប់ការសាកសួរនោះទេ ដោយលើកហេតុផលថា នាងគ្មានលិខិតអញ្ជើញ ។
សូមស្ដាប់ នាង សឺន ស្រីណែត តាមការសាកសួររបស់ លោក ស៊ឺន ចែងចើន នៃវិទ្យុសំឡេងកម្ពុជាក្រោម ជុំវិញរឿងនេះ ដូចតទៅ ៖
ជុំវិញបញ្ហានេះ វិទ្យុសំឡេងកម្ពុជាក្រោម បានព្យាយាមទូរស័ព្ទទាក់ទងទៅតំណាងក្រុមយុវជនដែលរងការចោទសួរនោះ ប៉ុន្តែមិនទទួលបានការឆ្លើយតបណាមួយតាមទូរស័ព្ទឡើយ (មិនអាចទាក់ទងបាន) ។
ប៉ុន្តែ នៅមុនមួយថ្ងៃ ដែលត្រូវអាជ្ញាធរយួនហៅទៅសួរនាំ តំណាងក្រុមយុវជនខ្មែរក្រោមមួយរូប លោក ថាច់ ហ្វាងចឿង បានផ្តល់បទសម្ភាសន៍ជាមួយវិទ្យុសំឡេងកម្ពុជាថា លោក និងក្រុមរបស់លោកគ្មានការរារែកខ្លាចរអារក្នុងការស្លៀកពាក់ឡើយ ព្រោះថានេះ ជាសិទ្ធិមូលដ្ឋានរបស់មនុស្សគ្រប់រូប ដែលពួកគេមានសិទ្ធិពាក់ឯកសណ្ឋានណាមួយ តំណាងឲ្យជនជាតិដើមរបស់ពួកគេ ។
យ៉ាងណាក៏ដោយ នៅម៉ោងជិត ៤ រសៀល ថ្ងៃដដែលនេះ នាង ស្រីណែត បញ្ជាក់ប្រាប់ថា អាជ្ញាធរយួនបានចោទ ក្រុមយុវជនខ្មែរក្រោមនោះថា សកម្មភាពពាក់អាវយឺតរបស់សហព័ន្ធខ្មែរកម្ពុជាក្រោម ដែលមានមូលដ្ឋាននៅក្រៅប្រទេស ជាការប្រឆាំង នឹងរដ្ឋាភិបាលវៀតណាម ។ ប៉ុន្តែ ពួកគេមិនត្រូវបានចាប់ឃុំខ្លួននោះទេ ដោយអាជ្ញាធរយួនគ្រាន់តែគំរាមគំហែង និងមិនឲ្យបន្តពាក់អាវយឺតនេះទៀតប៉ុណ្ណោះ ។
ទាក់ទិន នឹងអាជ្ញាធរយួន ដែលចោទពលរដ្ឋខ្មែរក្រោម ឬសកម្មជនខ្មែរក្រោម ចូលរួមសកម្មភាពជាមួយសហព័ន្ធខ្មែរកម្ពុជាក្រោម គឺតែងតែប្រឆាំង នឹងរដ្ឋាភិបាលវៀតណាមនោះ ។ ប្រធានសាខាសហព័ន្ធខ្មែរកម្ពុជាក្រោមប្រចាំកម្ពុជា លោក តាំង សារៈ កន្លងមកធ្លាប់បានប្រតិកម្មដោយច្រានចោលការចោទប្រកាន់នេះ ។ លោកថា ការចោទប្រកាន់ណាមួយមកលើសហព័ន្ធខ្មែរកម្ពុជាក្រោម គឺជាសិទ្ធិរបស់រដ្ឋាភិបាលវៀតណាម ។ ប៉ុន្តែ គោលការណ៍របស់សហព័ន្ធខ្មែរកម្ពុជាក្រោម គឺការពារផលប្រយោជន៍ពលរដ្ឋខ្មែរក្រោមរបស់ខ្លួន នៅពេលរងការរំលោភសិទ្ធិនានា ពីសំណាក់រដ្ឋាភិបាលវៀតណាម ជាពិសេសប្រឆាំងដាច់ខាត ចំពោះនយោបាយបំបាត់ពូជសាសន៍គ្រប់រូបភាព មកលើពលរដ្ឋខ្មែរក្រោម ដែលជាជនជាតិដើមម្ចាស់ស្រុក នៅលើដែនដីកម្ពុជាក្រោម ។
អាជ្ញាធរយួនជាញឹកញយតែងតែកោះហៅ និងមកដល់វត្ត និងផ្ទះ ដើម្បីសួរចម្លើយព្រះសង្ឃ និងពលរដ្ឋខ្មែរក្រោម ដែលសកម្មភាពទាំងនេះ ត្រូវបានពលរដ្ឋខ្មែរក្រោមចាត់ទុកថា ជាការគំរាមកំហែងដល់សិទ្ធិសេរីភាពក្នុងការរស់នៅរបស់ពួកគេយ៉ាងខ្លាំង ។
ត្រង់ចំណុចនេះ លោក តាំង សារៈ បញ្ជាក់ថា នេះជាការរំលោភសិទ្ធិជាទម្ងន់ពីសំណាក់អាជ្ញាធរវៀតណាម មកលើពលរដ្ឋខ្មែរក្រោម និងរំលោភទៅលើ «គោលការណ៍សិទ្ធិមនុស្ស និងគោលការណ៍សិទ្ធិជនជាតិដើម» ដែលបានអនុម័ត និងការប្រកាសនូវសេចក្តីប្រកាសជាសាកលស្តីពីសិទ្ធិទាំងនោះ ។ យ៉ាងណាក៏ដោយ លោកពន្យល់ថា វាពិបាកសម្រាប់ការ អនុវត្តន៍សិទ្ធិទាំងនេះឲ្យពេញលេញ ទៅលើបណ្តាប្រទេសដែលប្រកាន់យករបប់កុម្មុយនិស្ត ដូចជាប្រទេសវៀតណាម ៖
លោក តាំង សារៈ បានអំពាវនាវដល់ដ្ឋាភិបាលប្រទេសនានា ឲ្យដាក់ទណ្ឌកម្ម ឬប្រើនូវមធ្យោបាយការទូត ដើម្បីដាក់សម្ពាធ និងជម្រុញឲ្យប្រទេសវៀតណាម ត្រូវតែគោរពសិទ្ធិពលរដ្ឋខ្មែរក្រោម ឲ្យមានប្រសិទ្ធិភាព និងពេញលេញ ស្របតាមបទដ្ឋានសិទ្ធិមនុស្សអន្ដរជាតិ ដែលវៀតណាម ជាសាមាជិកហត្ថាលេខីមួយផងដែរនោះ ។
បន្ទាប់ពីបារាំងបានផ្ទេរដែនដី កម្ពុជាក្រោម ឬដែនដីកូស័ងស៊ីនទៅឲ្យវៀតណាមបន្តធ្វើអាណានិគមលើពល រដ្ឋខ្មែរក្រោម កាលពីថ្ងៃទី ៤ ខែមិថុនា ឆ្នាំ ១៩៤៩ មក សិទ្ធិសេរីភាពរបស់ជនជាតិខ្មែរក្រោម ត្រូវរដ្ឋាភិបាលយួនរំលោភបំពានជាបន្តបន្ទាប់ ក្នុងនោះ មានការចាប់ព្រះសង្ឃ និងពលរដ្ឋដាក់ពន្ធនាគារពីបទប្រឆាំងរដ្ឋាភិបាលជាដើម ៕
Comments are closed.