អាជ្ញាធរ​យួន​រំលោភ​យក​ដី​របស់​វត្ត​ខ្មែរ​មួយ នៅ​ខេត្ត​មាត់ជ្រូក ដើម្បី​សាងសង់​ទីស្នាក់ការ​

0 678

ដោយ ស៊ឺន ចែងចើន | VOKK

​អាជ្ញាធរ​យួន ស្រុក​ស្វាយ​ទង ខេត្ត​មាត់ជ្រូក នៃ​ដែនដី​កម្ពុជា​ក្រោម នៅ​ថ្ងៃទី ៦ ធ្នូ ២០១៧ នេះ បាន​ចុះ​ធ្វើ​សកម្មភាព​ឈូសឆាយ និង​វាស់វែង​រឹបអូស​យក​ដី​វត្ត​មក​ធ្វើ​ទីស្នាក់ការ​របស់ខ្លួន ខណៈ​ព្រះចៅអធិការ​វត្ត និង​ពុទ្ធបរិស័ទ​ធ្វើការ​តវ៉ា តែ​រង​ការ​គំរាម​គំហែង ពី​សំណាក់​ក្រុម​អាជ្ញាធរ​យួន ។​

ទីស្នាក់ការភូមិ (ទីស្នាក់ការចាស់) ដែលអាជ្ញាធរយួនសាងសង់រំលោភចូលទៅដីរបស់វត្ត
ទីស្នាក់ការភូមិ (ទីស្នាក់ការចាស់) ដែលអាជ្ញាធរយួនសាងសង់រំលោភចូលទៅដីរបស់វត្ត

​ព្រះសង្ឃ​ខ្មែរក្រោម​មួយអង្គ ក្នុង​លក្ខខណ្ឌ​សុំ​មិន​បញ្ចេញ​ព្រះនាម បាន​ប្រាប់​វិទ្យុ​សំឡេង​កម្ពុជា​ក្រោម ពី​ទឹកដី​ខេត្ត​មាត់ជ្រូក​មក​ថា នៅ​ព្រឹក​នេះ ដី​វត្ត​ទំពូង​ក្រោម ស្ថិតនៅ​ឃុំ​លឿង​ភី ស្រុក​ស្វាយ​ទង ខេត្ត​មាត់ជ្រូក ត្រូវបាន​អាជ្ញាធរ​យួន​មួយក្រុម ចុះមក​ទន្ទ្រាន​ដី​វត្ត​យក​ធ្វើជា​កម្មសិទ្ធិ រួច​បើក​ការដ្ឋាន​សាងសង់​ទីស្នាក់ការ​នគរបាល​ភូមិ និង​ទីប្រជុំ​របស់​អាជ្ញាធរ​យួន នៅ​លើដី​វត្ត​តែម្តង ។​

​ព្រះអង្គ​មាន​សង្ឃដីកា​បន្តថា ក្នុងពេល​ក្រុម​អាជ្ញាធរ​យួន កំពុង​ធ្វើ​សកម្មភាព​ឈូសឆាយដី និង​យក​គ្រឿង​បរិក្ខារ​សំណង់​សម្រាប់​សាងសង់​ទីស្នាក់ការ​នោះ ព្រះចៅអធិការ​វត្ត រួមជាមួយ​ពុទ្ធបរិស័ទ​ជើងវត្ត​ផង​នោះ បាន​តវ៉ា​ជំទាស់ និង​ឲ្យ​រុះរើ​យក​គ្រឿង​បរិក្ខារ​សំណង់​ទាំងអស់​ចេញពី​ដី​វត្ត ។ ប៉ុន្តែ បែរជា​ក្រុម​ជនជាតិ​យួន​ទាំងនោះ គំរាម​គំហែង ដោយ​ប្រើពាក្យ​ជេរប្រមាថ ពាក្យ​អសុរោះ និង​សម្តី​ហិង្សា ដាក់​ព្រះសង្ឃ និង​ពុទ្ធ​បរិ​ស័​ទ្ធ​វិញ ។

ព្រះ​សង្ឃ​​ខ្មែរ​ក្រោម​​ដដែល​​អង្គ​​នេះ បាន​​រៀប​រាប់​​ប្រាប់​​វិទ្យុ​​សំ​ឡេង​​កម្ពុជា​​ក្រោម អំ​​ពី​ដំ​ណើរ​​ដើម​ទង​​ប្រវត្តិ​​របស់​​ដី​​វត្ត​​ទំ​ពូង​​ក្រោម ដែល​រដ្ឋ​អំ​ណាច​យួន​រឹប​អូស​ដី​ធ្លី​វត្ត យ៉ាង​ដូច្នេះ ៖

​គួររំឭកថា ជម្លោះ​បញ្ហាដីធ្លី​នៅតាម​វត្ត​អារាម នៅ​កម្ពុជា​ក្រោម នាពេល​ប៉ុន្មាន​ឆ្នាំ​ចុង​ក្រោយនេះ តែង​កើតមានឡើង​ជារឿយៗ ដោយ​ពលរដ្ឋ​ជា​ជនជាតិ​យួន តែងតែ​ទៅ​រំលោភ​រឹបអូស​យក​ដី​វត្ត ដោយ​ឃុបឃិត​ជាមួយ​អាជ្ញាធរ​យួន លួច​ចុះបញ្ជី​ប័ណ្ណកម្មសិទ្ធិ​ដីធ្លី​មក​ធ្វើជា​របស់ខ្លួន ។ ជាក់ស្តែង ដូច​ករណី​ជម្លោះ​បញ្ហាដីធ្លី នៅ​វត្ត​មុនី​រង្សី (​មេ​ពាំង​) ជាមួយ នឹង​ជនជាតិ​យួន​បានអូសបន្លាយ​រ៉ាំរ៉ៃ​ជា​យូរ​មកហើយ និង​ករណី​មួយទៀត ដែល​ទើប នឹង​កើតឡើង​ថ្មីៗ នេះ គឺ​ជនជាតិ​យួន​យក​ដី​របស់​វត្ត​ពោធិ​ភិរម្យ​រង្សី នៅ​ស្រុក​កំពង់​ស្ពាន ខេត្ត​ព្រះ​ត្រពាំង​ធ្វើជា​ដី​របស់​រដ្ឋ ហើយ​បន្ទាប់មក​ពុះ​លក់​ឲ្យ​ឈ្មួញ ។ ប៉ុន្តែ រហូតរ​មកដល់ពេលនេះ ដ្ឋា​ភិ​បាល​យួន​នៅតែ​ធ្វើ​ព្រងើយ ដោយ​មិន​ព្រម​ដោះស្រាយ​ឲ្យ​បាន​ដាច់ស្រេច​នៅឡើយ ៕

Leave A Reply

Your email address will not be published.