ដោយ ស៊ឺន ចែងចើន
ក្រុមនគរបាលយួន នៅខេត្តលង់ហោរ ប្រមាណជាង ១០០ នាក់ នៅវេលាម៉ោង ៥ រសៀល ថ្ងៃទី ២៣ ខែធ្នូ ឆ្នាំ ២០២២ បានចុះទៅឡោមព័ទ្ធវត្តមង្គលបុរីទ្រនុំសេក ដោយសារតែព្រះសង្ឃក្នុងវត្តតែងចេញមុខប្រឆាំងនឹងអាជ្ញាធរវៀតណាម ករណីរំលោភសិទ្ធិសាសនា ។
លោកតាអាចារ្យម្នាក់ ថ្លែងសុំមិនបញ្ចេញឈ្មោះ ប្រាប់សំឡេងកម្ពុជាក្រោម (VOKK) និងសារព័ត៌មាន ព្រៃនគរ ថា ព្រះសង្ឃក្នុងវត្ត បានវាយគង ជួង រគាំង និងទូងស្គរ លាន់ឮពេញវត្តអារាម ដើម្បីប្រកាសដំណឹងដល់ពុទ្ធបរិស័ទដឹងថា ជាសញ្ញា នៃ ហេតុការណ៍មិនល្អ កើតឡើងក្នុងវត្ត ។ លោកតាអាចារ្យដដែលបញ្ជាក់ថា បន្ទាប់ពីឮសំឡេងទូងស្គរភ្លាម ក្រុមប្រជាពលរដ្ឋ ដែលជាពុទ្ធបរិស័ទចំណុះជើងវត្តទ្រនុំសេក បានរត់មកទីវត្តអារាម ដើម្បីការពារវត្ត និងការពារព្រះសង្ឃហើយ ។
ទោះជាយ៉ាងណា អាជ្ញាធរយួន នៅមិនទាន់ដកកម្លាំងត្រឡប់ទៅវិញនៅឡើយ ដោយនៅតែដើរដើរល្បាត ជុំវិញបរិវេនវត្តនៅឡើយ ។ ចំណែកព្រះសង្ឃ និងពុទ្ធបរិស័ទ បិទទ្វាររបងមិនឲ្យអាជ្ញាធរយួនចូល ហើយប្ដេជ្ញាថា នឹងការពារវត្តមិនឲ្យពួកគេចូលមកអុកឡុកក្នុងវត្ត និងចាប់ព្រះកាយព្រះសង្ឃនោះទេ ។
បើតាមលោកតាអាចារ្យ អះអាងថា មូលហេតុដែលនគរបាលមកឡោមព័ទ្ធវត្ត អាចជាករណីសងសឹករបស់អាជ្ញាធរយួនមកលើព្រះសង្ឃ និងពុទ្ធបរិស័ទខ្មែរក្រោម ដែលហ៊ានចេញមុខកសាងសាលាឆទាន នៅភូមិកន្រែង ដែលវៀតណាមហាមឃាត់ និងការពារដើមគគីរ ដែលជាបេតិកភណ្ឌរបស់វត្តទ្រនុំសេក មានអាយុកាលជាង ៧០០ ឆ្នាំ មិនឲ្យអាជ្ញាធរយួនកាប់បំផ្លាញចោល កាលពីថ្ងៃខែមីនា ឆ្នាំ ២០២២ កន្លងទៅ ។
