អាជ្ញាធរ​វៀតណាម​ ​ខេត្ត​ក្រមួនស​ ​រារាំង​ពលរដ្ឋ​ខ្មែរក្រោម​ ​មិន​ឲ្យ​ចូល​ធ្វើ​ស្រូវប្រាំង​

0 183

ដោយ ស៊ឺន ចែងចើន

សំណុំរឿង​ដីធ្លី នៅ​ខេត្ត​ក្រមួនស បានអូសបន្លាយ​ជិត ៣ ឆ្នាំ មកហើយ ។ កសិករ​ខ្មែរក្រោម​ជា​ម្ចាស់​ដីធ្លី នៅតែ​ក្លាយជា​ជនរងគ្រោះ និង​មិនទាន់​ទទួលបាន​ការដោះស្រាយ​ស​ម​ស្រប​ណាមួយ​ឡើយ ពី​រដ្ឋាភិបាល​វៀតណាម ក្រៅតែពី​ការ​បំបិទ​សិទ្ធិសេរីភាព​មិន​ឲ្យ​ពួកគាត់​តវ៉ា ដើម្បី​ដឹងឮ​ពី​សហគមន៍​អន្តរជាតិ ។ បន្ទាប់ពី​អស់ជំនឿ​លើ​យន្តការ​ដោះស្រាយ ពី​សំណាក់​រដ្ឋាភិបាល​វៀតណាម ក្នុងករណី​ជម្លោះដីធ្លី​ជាមួយ​អាជ្ញាធរ​នៅ​មូលដ្ឋាន ប្រជាកសិករ​ខ្មែរក្រោម បង្ខំចិត្ត​នាំគ្នា​ចូលទៅ​ធ្វើស្រែ នៅ​លើដី​ទំនាស់​វិញ​នា​រដូវប្រាំង​ឆ្នាំនេះ តែ​ត្រូវបាន​អាជ្ញាធរ​វៀតណាម ដាក់​កម្លាំង​សមត្ថកិច្ច​ចម្រុះ រារាំង​មិន​ឲ្យ​ធ្វើដំណើរ​ទៅដល់​ដីស្រែ​ចម្ការ​របស់​ពួកគេ​ឡើយ ដោយ​អះអាងថា ដីស្រែ​ទាំងនោះ ជា​ដី​របស់​រដ្ឋ ។

ការ​ប្រឈមមុខ​ដាក់​គ្នា​រវាង​កម្លាំង​សមត្ថកិច្ច និង​ប្រជាកសិករខ្មែរក្រោម ដែលព្យាយាមចូលទៅធ្វើស្រែ នៅលើដីរបស់ខ្លួន កាលពីថ្ងៃទី ៩ ខែមករា ២០២២ ។ រូបៈ Screenshot
ការ​ប្រឈមមុខ​ដាក់​គ្នា​រវាង​កម្លាំង​សមត្ថកិច្ច និង​ប្រជាកសិករខ្មែរក្រោម ដែលព្យាយាមចូលទៅធ្វើស្រែ នៅលើដីរបស់ខ្លួន កាលពីថ្ងៃទី ៩ ខែមករា ២០២២ ។ រូបៈ Screenshot

ប្រជាពលរដ្ឋ​ខ្មែរក្រោម ប្រមាណ​ជាង ៥០ នាក់ មកពី​ភូមិ​ចំនួន​បី គឺ​ភូមិ​ប៉ប្រក់ ភូមិ​ខ្សាច់ និង​ភូមិ​កោះរ​ងៀង ស្ថិតក្នុង​ឃុំ​ប៉ប្រក់ ស្រុក​ព្រៃ​មេ​ង ខេត្ត​ក្រមួនស (Phú Mỹ, Giang Thành, Kiên Giang) ដែលមាន​ដីស្រែ នៅក្នុង​ដែន​អភិរក្ស​វាលស្មៅ​ដុង​-​ក​-​បាង (Đồng cỏ bàng) និង​តំបន់​អភិរក្ស​សត្វ​ក្រៀល​ក្បាល​ក្រហម នៅ​ថ្ងៃទី ៩ ខែមករា សប្តាហ៍​នេះ បាន​លើកគ្នា​ចូលទៅ​ធ្វើស្រែ​ប្រាំង​លើដី ដែល​អ្នកភូមិ​ធ្លាប់ធ្វើ​ជិត ៥០ ឆ្នាំ​មកហើយ នោះ​វិញ តែ​ត្រូវ​អាជ្ញាធរ​វៀតណាម ប្រើ​កម្លាំង​សមត្ថកិច្ច​ចម្រុះ​រាប់សិប​នាក់​បិទផ្លូវ រារាំង​មិន​ឲ្យ​ចូលទៅ​ធ្វើស្រែ និង​គំរាមកំហែង​ចាប់​ដាក់ពន្ធនាគារ ។​

ប្រជាកសិករ​ខ្មែរក្រោម រស់នៅក្នុង​ភូមិ​ចំនួន ៣ ខាងលើ អះអាង នៅ​ថ្ងៃទី ១០ ខែមករា ថា អាជ្ញាធរខេត្ត​នេះ នៅតែ​បន្ត​ដាក់ពង្រាយ​កម្លាំង​សមត្ថកិច្ច​ចម្រុះ​រារាំង​ពួកគាត់ មិន​ឲ្យ​ធ្វើស្រែ​ចិញ្ចឹមជីវិត​លើដី​របស់​ពួកគេ ដែល​បាន​អាស្រ័យ​ផល និង​កាន់កាប់​ជាច្រើន​ជំនាន់​មកហើយ ។​

តំណាង​ពលរដ្ឋ​ខ្មែរក្រោម មកពី​ភូមិ​ប៉ប្រក់ ដែលមាន​បញ្ហាដីធ្លី​ជាមួយ​អាជ្ញាធរ​វៀតណាម ថ្លែង​ក្នុង​លក្ខខណ្ឌ​មិន​បញ្ចេញ​ឈ្មោះ ព្រោះ​ព្រួយបារម្ភ​ពី​សុវត្ថិភាព ពី​សំណាក់​អាជ្ញាធរ​វៀតណាម ប្រាប់​វិទ្យុ​សំឡេង​កម្ពុជា​ក្រោម និង​សារព័ត៌មាន ព្រៃនគរ ថា សមត្ថកិច្ច បាន​ចុះ​ល្បាត​ឃ្លាំមើល​អ្នកភូមិ និង​តំណាង​ពលរដ្ឋ​ដល់​លំនៅឋាន ក្នុង​បំណង​គំរាមកំហែង ព្រោះ​ខ្លាចក្រែង​ពួកគេ​ងើប​តវ៉ា ។​

កសិករ​ដដែល បាន​ឲ្យ​ដឹង​ទៀតថា បច្ចុប្បន្ន ពលរដ្ឋ​ខ្មែរក្រោម មិនអាច​បង្កបង្កើនផល​ដាំ​ដុះ​ដំណាំ​លើដី​ស្រែ នៅ​តំបន់​ទំហំ​ជាង ៣.០០០ ហិកតារ តាំងពី​ដូនតា​មក ដោយ​អាជ្ញាធរ​វៀតណាម តែងតែ​រារាំង ។ កសិករ​រូបនេះ អះអាងថា ផ្ទៃដី​ដែល​កំពុង​ធ្វើ​ស្រូវ​នោះ ពុំមាន​ផ្នែក​ណាមួយ ត្រូវបាន​អាជ្ញាធរ​ចេញ​ប័ណ្ណកម្មសិទ្ធិ​ដីធ្លី​ស្របច្បាប់​ឲ្យ​នោះទេ ខណៈ​ពួកគាត់​អះអាងថា បាន​អាស្រ័យ​ផល​លើដី​នោះ តាំងពី​អំឡុង​ឆ្នាំ ១៩៧៣ មកម្ល៉េះ ។​

ទាក់ទង​ទៅនឹង​ប្រវត្តិ​នៃ​ជម្លោះដីធ្លី​ដ៏​រ៉ាំរ៉ៃ​មួយ​នេះ កសិករ​ដដែល ឲ្យ​ដឹងថា ក្នុង​ខេត្ត​ក្រមួនស បញ្ហា​ទំនាស់​ដីធ្លី​រវាង​ប្រជាពលរដ្ឋ​ជាមួយ​អាជ្ញាធរ​វៀតណាម និង​រវាង​ប្រជាពលរដ្ឋ​ជាមួយ​ក្រុមហ៊ុន ករណី​ទំនាស់​ខ្លះ​អូសបន្លាយ​រយៈពេល​មិនតិចជាង ២០ ឆ្នាំ​នោះឡើយ ។ កសិករ​រូបនេះ រៀបរាប់​បន្ថែមថា គ្រួសារ​អ្នកស្រី មាន​ដី​ច្រើន​ហិកតារ ដែល​បាន​អាស្រ័យ​ផល​តាំងពី​ដូនតា​មក ពោលគឺ​នៅ​ឆ្នាំ ១៩៨២ ពលរដ្ឋ​ខ្មែរក្រោម បានមក​កាប់ឆ្ការ​ដី និង​កែប្រែ ព្រមទាំង​ធ្វើស្រែ នៅ​តំបន់ ដែល​កំពុងមាន​វិវាទ ។ អ្នកស្រី​បន្តថា ការធ្វើ​ស្រែ នៅលើ​ដី​នោះ រហូតដល់​ឆ្នាំ ២០០០ ពេលនោះ ក៏​ជួប​គ្រោះទឹកជំនន់ ចំនួន ៣ ឆ្នាំ​ជាប់ៗ គ្នា ធ្វើ​ឲ្យ​កសិករ​ខ្មែរក្រោម ទាំងនោះ មិនអាច​ធ្វើស្រែ​បាន ក៏​សម្រេចចិត្ត​ផ្អាក​ធ្វើស្រែ​លើដី​នោះ​មួយរយៈ ។ លុះដល់​ឆ្នាំ ២០០៣ គណៈកម្មាធិការ​ប្រជាជន​ឃុំ​ប៉ប្រក់ (Phú Mỹ) បាន​បំផុសគំនិត​កសិករ​ខ្មែរក្រោម ដាំ​ចចូត​រយៈពេល ៤ ឆ្នាំ ហើយ​កសិករ​ទាំងអស់ ក៏​យល់ព្រម ហើយ​នៅពេល ដែល​ប្រមូលបាន​ផល ត្រូវ​លក់​ជូន​ក្រុមហ៊ុន​យួន​មួយ ដែល​ក្រុម​អាជ្ញាធរ បាន​សហការ​ជាមួយ ។ ពលរដ្ឋ​តំណាង​ឲ្យ​កសិករ ដែល​សុំ​មិន​បញ្ចេញ​ឈ្មោះ​ដដែល​នេះ រៀបរាប់​ឲ្យ​ដឹង​ទៀតថា ពេល​ប្រមូល​ចចូត​លក់​ទៅ​ឲ្យ​ក្រុមហ៊ុន ពួកគេ​ទិញ​ក្នុង​តម្លៃថោក​ថែមទៀត ។ ចំណែក នៅពេល​ទូទាត់​សង​ថ្លៃ​ចចូត​ដល់​ប្រជាកសិករ​ខ្មែរក្រោម បែរជា​ក្រុមហ៊ុន​ពន្យារពេល​មួយខែ​ហើយ​មួយខែ​ទៀត ដោយ​ត្រឹមតែ​បង្ហាញ​បង្កាន់ដៃ​មក​ឲ្យ​ពួកគាត់​ប៉ុណ្ណោះ ។

ស្រដៀង​គ្នា​នេះ កសិករ​ខ្មែរក្រោម មកពី​ភូមិ​ខ្សាច់​មួយរូប​ទៀត យល់ថា ប្រជាកសិករ​ខ្មែរក្រោម រង​ការ​ភូតភរ បោកប្រាស់ និង​ក្លែងបន្លំ​ឯកសារ​ដីធ្លី ពី​សំណាក់​អាជ្ញាធរ​វៀតណាម ដើម្បី​រំលោភ​យក​ដី​របស់​ពួកគាត់ ។ កសិករ​រូបនេះ បាន​រំឭក​ឡើងវិញ​ថា នៅ​ចន្លោះ​ខែឧសភា​ឆ្នាំ ២០២០ បន្ទាប់ពី​អាជ្ញាធរ​វៀតណាម ខេត្ត​ក្រមួនស រួមមាន ប៉ូលិស និង​ទាហាន ដែល​ប្រដាប់​ដោយ​អាវុធ​ប្រមាណ​ជាង ១០០ នាក់ បង្ក្រាប​ដោយ​ហិង្សា​ទៅលើ​ប្រជាកសិករ​ខ្មែរក្រោម ដែល​ចេញ​តវ៉ា​រឿង​ដីធ្លី​រួចមក អាជ្ញាធរ​វៀតណាម បាន​កោះហៅ​ពលរដ្ឋ​មាន​ជម្លោះដីធ្លី​រ៉ាំរ៉ៃ ឲ្យ​ចូលរួម​ប្រជុំ​រក​ដំណោះស្រាយ នៅ​សាលាឃុំ​ប៉ប្រក់ (Phú Mỹ) ។ ពេលនោះ អ្នកភូមិ​ជា​ខ្មែរក្រោម មាន​សង្ឃឹមថា អាជ្ញាធរ នឹង​ផ្ដល់​ដំណោះស្រាយ​យ៉ាង​សមរម្យ ដោយ​ចេញ​ប្លង់​កាន់កាប់​ដីធ្លី ឬ​លិខិតបញ្ជាក់​ពី​ការប្រើប្រាស់​ដីធ្លី ឲ្យ​ពួកគាត់ ។ ប៉ុន្តែ ផ្ទុយទៅវិញ បែរជា​ធ្វើ​ឲ្យ​ប្រជាពលរដ្ឋ​ខ្មែរក្រោម​ខកចិត្ត ដោយសារតែ​អាជ្ញាធរ​វៀតណាម ឆ្លៀតឱកាស​ដែល​ពួកគាត់​មិនចេះ​អក្សរ ហើយ​ខ្វះ​ចំណេះដឹង​ផ្លូវច្បាប់ និង​ការយល់ដឹង​អំពី​សិទ្ធិ​របស់ខ្លួន នៅមានកម្រិត​ផង ទើប​ពួកគេ​ប្រើ​ឥទ្ធិពល​របស់ខ្លួន ក្លែងបន្លំ​ឯកសារ​យក​ដី​របស់​ប្រជាពលរដ្ឋ​ខ្មែរក្រោម ទៅ​ជួល​ឲ្យ​ក្រុមហ៊ុន​ដាំ​ដើម​ចចូត និង​យក​លេស​ថា ជា​តំបន់​អភិរក្ស​សត្វ​ក្រៀល​ក្បាល​ក្រហម ។ បន្ថែម​ពីលើ​នេះ កសិករ​ដដែល ក៏​អះអាងថា ពួក​អាជ្ញាធរ បាន​គំរាម​គំហែង ដោយ​ប្រើប្រាស់​ប្រព័ន្ធតុលាការ ដើម្បី​ចោទប្រកាន់​ពួកគេ​ឲ្យ​មានទោស​ទៀតផង ។​​

គួររំលឹកថា ក្នុង​ឆ្នាំ ២០២១ ជម្លោះដីធ្លី នៅ​ខេត្ត​ក្រមួនស បាន​កើតឡើង​យ៉ាងតិច ៣ ករណី ដែល​ធ្វើឱ្យប៉ះពាល់​ដល់​គ្រួសារ​ខ្មែរក្រោម​ប្រមាណ​ជាង ១០០០ នាក់ ស្មើនឹង​ជិត ២០០ គ្រួសារ ដែលជា​ជនរងគ្រោះ​នៃ​ការបង្ខំ​បណ្ដេញ​ចេញពី​ដីធ្លី និង​ទទួលរង​នូវ​អំពើហិង្សា ពី​សំណាក់​អាជ្ញាធរ​វៀតណាម រហូត​ឈានដល់​ការចាប់ខ្លួន​កសិករ​ខ្មែរក្រោម​មួយរូប​ដាក់ពន្ធនាគារ​ទៀតផង ។​

សិករខ្មែរក្រោម ៣ រូប ដែលត្រូវបានតុលាការវៀតណាម ក្នុងខេត្តក្រមួនស កាត់ទោសដាក់ពន្ធនាគារ ចន្លោះពី ៩ ខែទៅ ២ ឆ្នាំកាលពី​ថ្ងៃ​ទី​ ៦​ ​ខែ​ឧសភា​ ​ឆ្នាំ​ ​២​០​២​១ ។ រូបៈ ផ្តល់ឲ្យ
សិករខ្មែរក្រោម ៣ រូប ដែលត្រូវបានតុលាការវៀតណាម ក្នុងខេត្តក្រមួនស កាត់ទោសដាក់ពន្ធនាគារ ចន្លោះពី ៩ ខែទៅ ២ ឆ្នាំកាលពី​ថ្ងៃ​ទី​ ៦​ ​ខែ​ឧសភា​ ​ឆ្នាំ​ ​២​០​២​១ ។ រូបៈ ផ្តល់ឲ្យ

សូមបញ្ជាក់​ផងដែរ ថា នៅ​ឆ្នាំ ២០២១ តុលាការ​វៀតណាម ក្នុង​ខេត្ត​មួយ​នេះ ក៏បាន​ចាប់ខ្លួន​កសិករ​ខ្មែរក្រោម ៣ រូប ដាក់ពន្ធនាគារ ដោយ​ក្នុងនោះ លោក ហ្វិ​ន វ៉ាំ​ង​ឌែ​ប កាត់ទោស​ឲ្យ​ជាប់ពន្ធនាគារ ២ ឆ្នាំ ហើយ​លោក​ត្រូវ​ចាប់ឃុំខ្លួន ដើម្បី​អនុវត្ត​ទោស នៅ​ថ្ងៃទី ៨ ខែមិថុនា ឆ្នាំ ២០២១ ខណៈ​លោក តៀន ដាម ផ្ដន្ទាទោស​ឲ្យ​ជាប់ពន្ធនាគារ ២ ឆ្នាំ និង​លោក តៀន ណា​ម ជាប់ទោស ៩ ខែ អ្នក​ទាំងពីរ​រូបនេះ ត្រូវ​អាជ្ញាធរ​យួន ចាប់​បញ្ជូនទៅ​ឃុំខ្លួន​នៅ​ពន្ធនាគារ នៅ​ថ្ងៃទី ៩ ខែធ្នូ ឆ្នាំ ២០២១ ។ ចំណែក លោកយាយ ធី ភិ​ច អាយុ ៧១ ឆ្នាំ ផ្ដន្ទាទោស​ឱ្យ​ជាប់ពន្ធនាគារ ១ ឆ្នាំ ប៉ុន្តែ ដាក់ឱ្យ​ស្ថិតនៅ​ក្រៅ​ពន្ធនាគារ​ជា​បណ្តោះអាសន្ន ។ ក្រៅពី​កសិករ​ខ្មែរក្រោម ទាំង ៤ នាក់ ដែល​ត្រូវបាន​តុលាការ​ចោទប្រកាន់​ខាង​លើ នៅមាន​ពលរដ្ឋ​ខ្មែរក្រោម ជាប់​ពាក់ព័ន្ធ​ចំនួន ២៣ នាក់​ផ្សេងទៀត ក៏ត្រូវ​បាន​អាជ្ញាធរ​វៀតណាម សម្រេច​ដាក់ពិន័យ​រដ្ឋបាល ដោយ​ពិន័យ​ជា​ប្រាក់​ក្នុង​ម្នាក់ៗ ចាប់ពី ៣ លាន​ដុង​ទៅ ៤ លាន ដុង ឬ​ស្មើនឹង ១៥០ ទៅ ២០០ ដុល្លារ​អាមេរិក ៕

Leave A Reply

Your email address will not be published.